കാന്താര 2ൽ സൂപ്പർസ്റ്റാർ രജിനികാന്തും? സൂചന നൽകി ഋഷഭ് ഷെട്ടി

കഴിഞ്ഞ വർഷം രാജ്യത്താകെ ശ്രദ്ധിക്കപ്പെട്ട സിനിമയായിരുന്നു കാന്താര. ഋഷഭ് ഷെട്ടി സംവിധാനം ചെയ്ത് അഭിനയിച്ച കന്നഡ ചിത്രത്തിന്റെ മൊഴിമാറ്റ പകർപ്പുകള്‍ക്കും വൻ സ്വീകാര്യതയാണ് ലഭിച്ചത്. രാജ്യത്തെ പ്രമുഖ താരങ്ങൾ ഉൾപ്പെടെയുള്ളവർ സിനിമയെ അഭിനന്ദിച്ച് രംഗത്ത് എത്തിയിരുന്നു. കാന്താരയ്ക്ക് രണ്ടാം ഭാഗം വരുന്നുവെന്ന് ഋഷഭ് ഷെട്ടി തന്നെ പ്രഖ്യാപിച്ചിരുന്നു. ഇപ്പോൾ ഇതുമായി ബന്ധപ്പെട്ട് ചർച്ചകൾക്ക് ചൂട് പകർന്നിരിക്കുകയാണ് സംവിധായകൻ.

കാന്താര 2ൽ നടൻ സൂപ്പർസ്റ്റാർ രജിനികാന്തും ഭാഗമായേക്കുമെന്നാണ് റിപ്പോർട്ട്. ഋഷഭ് ഷെട്ടി തന്നെയാണ് ഇതുസംബന്ധിച്ച സൂചന നൽകിയത്. ബെംഗളൂരുവിൽ നടന്ന ഒരു പരിപാടിയിൽ കാന്താരയുടെ വിജയത്തെക്കുറിച്ച് നടൻ സംസാരിച്ചിരുന്നു.

സിനിമയുടെ തിരക്കഥയുമായി ബന്ധപ്പെട്ടുള്ള ഗവേഷണങ്ങളും പ്രാഥമിക ജോലികൾ നടന്നു വരികയാണെന്നും നിരവധി സർപ്രൈസുകൾ ചിത്രത്തിലുണ്ടാകുമെന്നും ഋഷഭ് ഷെട്ടി പറഞ്ഞു. ചിത്രം പ്രേക്ഷകർക്ക് വ്യത്യസ്ത അനുഭവമായിരിക്കുമെന്നും അദ്ദേഹം കൂട്ടിച്ചേർത്തു.

ചിത്രത്തിൽ രജിനികാന്തും ഭാഗമായേക്കുമോ എന്ന് നടനോട് ചോദിച്ചിരുന്നു. പുഞ്ചിരിയായിരുന്നു മറുപടി. റിഷഭ് ഷെട്ടിയുടെ പ്രതികരണം ആരാധകരുടെ ഇടയിൽ വലിയ ചർച്ചയായിട്ടുണ്ട്.

കാന്താരയുടെ വിജയത്തിന് പിന്നാലെ രജിനിയെ ചെന്നൈയിലെ വീട്ടിലെത്തി ഋഷഭ് സന്ദർശിച്ചിരുന്നു. കൂടാതെ ചിത്രം കണ്ടതിന് ശേഷം കാന്താര ടീമിനെ പ്രശംസിച്ച് രജിനികാന്തും രംഗത്ത് എത്തിയിരുന്നു.