Riz Ahmed| കഴിഞ്ഞ വർഷം കൈയ്യെത്തും ദൂരത്ത് നഷ്ടമായി; ആദ്യ ഓസ്കാറിൽ മുത്തമിട്ട് റിസ് അഹമ്മദ്

കഴിഞ്ഞ തവണ കൈയ്യെത്തും ദൂരത്ത് നഷ്ടമായ ഓസ്കാർ (Oscar 2022)ഇത്തവണ നേടി ബ്രിട്ടീഷ്-പാകിസ്ഥാൻ നടൻ റിസ് അഹമ്മദ് (Riz Ahmed). മികച്ച ലൈവ് ആക്ഷൻ ഷോർട്ട് ഫിലിമിനാണ് റിസ് അഹമ്മദിന് ഓസ്കാർ ലഭിച്ചത്. (Image: Instagram)

അനിൽ കരിയയ്ക്കൊപ്പമാണ് റിസ് അഹമ്മദ് ഓസ്കാർ പങ്കിട്ടത്. 'ദി ലോങ് ഗുഡ് ബൈ' എന്ന ഷോർട്ട് ഫിലിമിനാണ് ഓസ്കാർ ലഭിച്ചത്. ചിത്രത്തിന്റെ സഹ എഴുത്തുകാരൻ കൂടിയാണ് റിസ് അഹമ്മദ്.

ഓസ്കാർ വേദിയിൽ പുരസ്കാരം ലഭിച്ചതിനു ശേഷം റിസ് അഹമ്മദ് നടത്തിയ പ്രസംഗവും ശ്രദ്ധേയമായി. "വിഭജിത കാലഘട്ടത്തിൽ നമ്മളും അവരും ഇല്ല, മറിച്ച് നമ്മൾ മാത്രമാണുള്ളതെന്നതാണ് ഈ കഥ ഓർമിപ്പിക്കുന്നത്" എന്നായിരുന്നു റിസ് അഹമ്മദിന്റെ പരാമർശം.

തനിക്ക് ലഭിച്ച പുരസ്കാരം തങ്ങളുട‌േതല്ല എന്ന് കരുതുന്ന എല്ലാവർക്കുമായി സമർപ്പിക്കുന്നുവെന്നും അഹമ്മദ് പറഞ്ഞു. ആരുമില്ലാത്ത നാട്ടിൽ ഒറ്റപ്പെട്ടു പോയതായി കരുതുന്നവർ നിങ്ങൾ ഒറ്റയ്ക്കല്ലെന്ന് തിരിച്ചറിയുക. സമാധാനം പുലർന്ന ഭാവിയിൽ നാമെല്ലാം കണ്ടുമുട്ടും. എന്നും റിസ് അഹമ്മദ് കൂട്ടിച്ചേർത്തു. (Image: Instagram)

കഴിഞ്ഞ വർഷം മികച്ച നടനുള്ള ഓസ്കോർ നോമിനേഷൻ നേടിയ നടനാണ് റിസ് അഹമ്മദ്. സൗണ്ട് ഓഫ് മെറ്റൽ എന്ന ചിത്രത്തിലെ അഭിനയത്തിനാണ് റിസ് അഹമ്മദ് മികച്ച നടനുള്ള പട്ടികയിൽ ഇടം നേടിയത്. സൗണ്ട് ഓഫ് മെറ്റൽ എന്ന ചിത്രത്തിനായിരുന്നു നോമിനേഷൻ. കേൾവി ശക്തി നഷ്ടമായ റോക്ക് ആന്റ് റോൾ ഡ്രമ്മറുടെ കഥാപാത്രമായിരുന്നു അദ്ദേഹം അവതരിപ്പിച്ചത്. (Image: Instagram)

2017 ൽ മികച്ച നടനുള്ള എമ്മി പുരസ്കാരവും റിസ് അഹമ്മദ് സ്വന്തമാക്കിയിരുന്നു. ലിമിറ്റഡ് സീരീസ് വിഭാഗത്തിലാണ് ദി നൈറ്റ് ഓഫ് എന്ന ചിത്രത്തിലെ അഭിനയത്തിന് റിസ് അഹമ്മദിന് പുരസ്കാരം ലഭിച്ചത്. എമ്മി ലഭിക്കുന്ന ആദ്യ മുസ്ലീം, ആദ്യ ഏഷ്യൻ നടനെന്ന ചരിത്രവും റിസ് അന്ന് കുറിച്ചിരുന്നു.

2021-ൽ പുറത്തിറങ്ങിയ അഹമ്മദിന്റെ അതേ പേരിലുള്ള ആൽബത്തിൽ നിന്നുള്ള സംഗീതം ഉൾപ്പെടുത്തിയാണ് ദി ലോംഗ് ഗുഡ്‌ബൈ പുറത്തിറങ്ങിയത്.

ആദ്യമായാണ് ഏഷ്യൻ വംശജനായ ഒരാൾ ലൈവ്-ആക്ഷൻ ഷോർട്ട് വിഭാഗത്തിൽ ഓസ്കാർ നേടുന്നത്.