Sai Pallavi | അനിയത്തിയുടെ ആദ്യ സിനിമ; പ്രാർത്ഥനയോടെ സായ് പല്ലവി

മലയാളത്തിലും തമിഴിലും തെലുങ്കിലും ഒരുപോലെ ആരാധകരുള്ള നടിയാണ് സായ് പല്ലവി(Sai Pallavi). പ്രേമം(premam Movie) എന്ന മലയാള സിനിമയിലൂടെ സിനിമാ ലോകത്ത് എത്തി തെന്നിന്ത്യ മുഴുവൻ കീഴടക്കിയ താരം ഇപ്പോൾ വലിയൊരു സന്തോഷ വാർത്ത പങ്കുവെച്ചിരിക്കുകയാണ്.

സായ് പല്ലവിക്ക് പിന്നാലെ അനുജത്തിയും സിനിമാ ലോകത്തേക്ക് കടന്നിരിക്കുകയാണ്. നേരത്തേ നിരവധി ഷോർട്ട്ഫിലിമുകളിൽ അഭിനയിച്ച പൂജ കണ്ണന്റെ ആദ്യ സിനിമ ഇന്ന് റിലീസ് ആയി.

ചിത്തിരൈ സെവ്വാനം എന്ന് പേരിട്ടിരിക്കുന്ന ചിത്രം സീ 5 ലാണ് റിലീസ് ചെയ്തിരിക്കുന്നത്. ഇൻസ്റ്റഗ്രാമിൽ അനുജത്തിക്ക് ആശംസകൾ നേർന്ന സായ് പല്ലവി സിനിമാ ജീവിതത്തിൽ മികച്ച വിജയങ്ങൾ തേടിയെത്തട്ടെയെന്നും പ്രാർത്ഥിക്കുകയാണ്

സ്റ്റണ്ട് കൊറിയോഗ്രാഫറായ സിൽവയുടെ ആദ്യ സംവിധാന സംരഭമാണ് ചിത്രം. അച്ഛനും മകളും തമ്മിലുള്ള ബന്ധമാണ് ചിത്രത്തിന്റെ പ്രമേയം. സമുദ്രക്കനി, റിമ കല്ലിങ്കൽ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

തന്റെ ജീവിതത്തിലെ സ്പെഷ്യൽ ദിവസമാണിതെന്ന് സായ് പല്ലവി ഇൻസ്റ്റയിൽ കുറിച്ചു. തനിക്ക് മാത്രമറിയാവുന്ന സത്യം ഇന്ന് ലോകം സാക്ഷിയാകാൻ പോകുകയാണെന്നാണ് സായ് പല്ലവി കുറിച്ചത്.

എല്ലാവരും ചിത്രം കാണണമെന്ന് സഹോദരിക്ക് വേണ്ടി സായ് പല്ലവി അഭ്യർത്ഥിച്ചു. പ്രേക്ഷകരുടെ സ്നേഹം തന്നെ പോലെ അനിയത്തിക്കും ലഭിക്കണമെന്നാണ് സായ് പല്ലവിയുടെ ആഗ്രഹം.

ഒപ്പം അനിയത്തിക്കായി ഉപദേശവും സായ് പല്ലവി നൽകുന്നുണ്ട്. ഒരു കഥാപാത്രം അവതരിപ്പിക്കുമ്പോൾ ലഭിക്കുന്ന സന്തോഷം പോലെ, പ്രേക്ഷകരിൽ നിന്നും ലഭിക്കുന്ന സ്നേഹവും ആവേശമാണ്. ആ യാത്ര ആസ്വദിക്കാനും സ്നേഹം കൊണ്ട് ചുറ്റപ്പെടാനും അനിയത്തിക്കു വേണ്ടി താൻ പ്രാർത്ഥിക്കുകയാണ്.

ഞാൻ നിന്നെ സ്നേഹിക്കുന്നു, എന്നും നിന്നെ സംരക്ഷിക്കും. ഉയരങ്ങളിലേക്ക് പറക്കുക എന്ന് പറഞ്ഞാണ് സായ് പല്ലവി പോസ്റ്റ് അവസാനിപ്പിക്കുന്നത്.

ഓൺലൈനിൽ സ്വന്തം ചിത്രങ്ങൾ പ്രചരിക്കപ്പെട്ടതിന് പിന്നാലെ ഐശ്വര്യ എന്ന പെൺകുട്ടിയെ കാണാതാകുന്നതും തുടർന്നുള്ള അന്വേഷണവുമാണ് ചിത്രത്തിന്റെ പ്രമേയം. എഎൽ വിജയ് ആണ് ചിത്രം നിർമിക്കുന്നത്. മകളെ അന്വേഷിക്കാൻ പൊലീസിന്റെ സഹായം തേടുന്ന മുത്തുപാണ്ടി എന്ന കഥാപാത്രത്തെയാണ് സമുദ്രക്കനി അവതരിപ്പിക്കുന്നത്. റിമ കല്ലിങ്കൽ ആണ് പൊലീസ് ഉദ്യോഗസ്ഥയായി എത്തുന്നത് .