രോഗം ഭേദമാകാൻ ആയുർവേദ ചികിത്സ തിരഞ്ഞെടുത്ത് സാമന്ത; ഹൈദരാബാദിൽ ചികിത്സയിൽ

മയോസിറ്റിസ് രോഗ ചികിത്സയ്ക്കായി തെന്നിന്ത്യൻ താരം സാമന്ത ആയുർവേദ ചികിത്സയ്ക്ക്. ഈ വർഷം ആദ്യമാണ് സാമന്തയ്ക്ക് മയോസിറ്റിസ് രോഗം സ്ഥിരീകരിച്ചത്.

ഇന്ത്യാ ഗ്ലിറ്റ്സ് റിപ്പോർട്ട് അനുസരിച്ച് രോഗ ചികിത്സയ്ക്കായി ആയുർവേദം തിരഞ്ഞെടുത്തിരിക്കുകയാണ്. നിലവിൽ ഹൈദരാബാദിലുള്ള നടി ഇവിടെയുള്ള പ്രമുഖ ആയുർവേദ ചികിത്സാ കേന്ദ്രത്തെ സമീപിച്ചിരിക്കുകയാണ്.

വിദേശത്ത് ചികിത്സയിലായിരുന്ന സാമന്ത അടുത്തിടെയാണ് ഹൈദരാബാദിൽ തിരിച്ചെത്തിയത്. ഇതിനിടയിൽ രോഗം മൂർച്ഛിച്ചുവെന്നും ആശുപത്രിയിൽ പ്രവേശിപ്പിച്ചുവെന്നും വാർത്തകൾ വന്നിരുന്നു.

ആരോഗ്യനില വഷളായതിനെ തുടർന്ന് നടിയെ ആശുപത്രിയിൽ പ്രവേശിപ്പിച്ചുവെന്നായിരുന്നു വാർത്തകൾ. എന്നാൽ ഈ വാർത്തകൾ സാമന്തയുടെ വക്താവ് തള്ളിക്കളയുകയും ചെയ്തു. സാമന്ത ആശുപത്രിയിലല്ലെന്നും വീട്ടിൽ വിശ്രമത്തിലാണെന്നുമായിരുന്നു വക്താവ് അറിയിച്ചത്.

ഒരു കൂട്ടം അപൂർവ ആരോഗ്യ അവസ്ഥകളാണ് സാമന്തയെ ബാധിച്ച മയോസിറ്റിസ്. രോഗപ്രതിരോധ സംവിധാനത്തെയും പേശികളെയും ആക്രമിക്കുന്ന ഒരു അവസ്ഥയാണിത്. പേശികളിൽ വീക്കത്തിലേക്ക് നയിക്കുന്ന ഒന്നോ അതിലധികമോ കാരണങ്ങളാൽ ഈ രോഗം ഉണ്ടാകാം. പേശി വേദനയും ബലഹീനതയുമാണ് പ്രധാന ലക്ഷണങ്ങൾ, ഇത് കാലക്രമേണ വഷളാകുന്നു. നടക്കുന്നതിനിടെ കാലിടറി വീഴുകയോ, കുറച്ചുദൂരം നടക്കുമ്പോഴേക്കും നല്ല ക്ഷീണം അനുഭവപ്പെടുകയും ചെയ്യുന്നു.

ഡെർമറ്റോമിയോസിറ്റിസ്, പോളിമയോസിറ്റിസ്, ഇൻക്ലൂഷൻ ബോഡി മയോസിറ്റിസ് തുടങ്ങിയ കോശജ്വലന അവസ്ഥകൾ കഠിനമായ മയോസിറ്റിസിന് കാരണമാകും. ലൂപ്പസ്, സ്ക്ലിറോഡെർമ, റൂമറ്റോയ്ഡ് ആർത്രൈറ്റിസ് എന്നിവയും ഈ അവസ്ഥയ്ക്ക് കാരണമാകാം. ചില മരുന്നുകൾ, ഗുരുതരമായ ശാരീരിക പരിക്കുകൾ എന്നിവയ്‌ക്കൊപ്പം വൈറൽ അണുബാധകളും മയോസിറ്റിസ് പിടിപെടാൻ കാരണമാകും.