മയോസിറ്റിസ് ചികിത്സയ്ക്കായി സാമന്ത ദക്ഷിണ കൊറിയയിലേക്ക്

തെന്നിന്ത്യൻ താരറാണി സാമന്ത റൂത്ത് പ്രഭു സൗത്ത് കൊറിയയിലേക്ക്. നടിയെ ബാധിച്ച മയോസിറ്റിസ് രോഗ ചികിത്സയ്ക്കായാണ് താരം ദക്ഷിണ കൊറിയയിലേക്ക് പോകുന്നതെന്നാണ് റിപ്പോർട്ടുകൾ. കഴിഞ്ഞ മാസമാണ് മയോസിറ്റിസ് രോഗം ബാധിച്ചതായി സാമന്ത വെളിപ്പെടുത്തിയത്.

നിലവിലെ ചികിത്സയിൽ ഫലം പ്രതീക്ഷിച്ചതിനേക്കാൾ വൈകുന്നതിനാലാണ് കൂടുതൽ മെച്ചപ്പെട്ട ചികിത്സ തേടി സൗത്ത് കൊറിയയിലേക്ക് പോകുന്നത് എന്നാണ് റിപ്പോർട്ടുകൾ. നേരത്തേ ഹൈദരാബാദിൽ തന്നെ ആയുർവേദ ചികിത്സ നടത്തുമെന്നും വാർത്തകൾ വന്നിരുന്നു.

ഇന്ത്യാ ഗ്ലിറ്റ്സ് റിപ്പോർട്ട് അനുസരിച്ച് സാമന്ത ഉടൻ തന്നെ ദക്ഷിണ കൊറിയയിലേക്ക് പോകുമെന്നും ചികിത്സ ആരംഭിക്കുമെന്നുമാണ് പറയുന്നത്. ഏതാനും മാസങ്ങൾ താരം രാജ്യത്ത് തുടരേണ്ടി വരുമെന്നും റിപ്പോർട്ടിൽ പറയുന്നു. ചികിത്സയ്ക്കു ശേഷം വിജയ് ദേവരകൊണ്ടയ്ക്കൊപ്പമുള്ള ഖുഷിയുടെ ചിത്രീകരണം പുനരാരംഭിക്കേണ്ടതുണ്ട്.

ഒരു കൂട്ടം അപൂർവ ആരോഗ്യ അവസ്ഥകളാണ് സാമന്തയെ ബാധിച്ച മയോസിറ്റിസ്. രോഗപ്രതിരോധ സംവിധാനത്തെയും പേശികളെയും ആക്രമിക്കുന്ന ഒരു അവസ്ഥയാണിത്. പേശികളിൽ വീക്കത്തിലേക്ക് നയിക്കുന്ന ഒന്നോ അതിലധികമോ കാരണങ്ങളാൽ ഈ രോഗം ഉണ്ടാകാം. പേശി വേദനയും ബലഹീനതയുമാണ് പ്രധാന ലക്ഷണങ്ങൾ, ഇത് കാലക്രമേണ വഷളാകുന്നു. നടക്കുന്നതിനിടെ കാലിടറി വീഴുകയോ, കുറച്ചുദൂരം നടക്കുമ്പോഴേക്കും നല്ല ക്ഷീണം അനുഭവപ്പെടുകയും ചെയ്യുന്നു.