മോദി വീണ്ടും പ്രധാനമന്ത്രിയായാല്‍ ഇന്ത്യ വിടും: സത്യം എന്തെന്ന് വ്യക്തമാക്കി ശബാന ആസ്മി

മുംബൈ: പ്രധാനമന്ത്രി നരേന്ദ്ര മോദി വീണ്ടും അധികാരത്തിലെത്തിയാൽ ബോളിവുഡ് താരവും സാമൂഹ്യ പ്രവർത്തകയുമായ ശബാന ആസ്മി ഇന്ത്യ വിടുമെന്ന തരത്തിലുള്ള വാർത്തകൾ കഴിഞ്ഞ ദിവനസമാണ് പുറത്തുവന്നത്.

എന്നാൽ വാർത്തകള്‍ സത്യമല്ലെന്ന് വ്യക്തമാക്കി താരം തന്നെ രംഗത്തെത്തിയിരിക്കുകയാണ്. താൻ ഇത്തരത്തിൽ പരാമര്‍ശങ്ങൾ ഒന്നും തന്നെ നടത്തിയിട്ടില്ലെന്നാണ് ശബാന ആസ്മി പറയുന്നത്

വാർത്ത കെട്ടിച്ചമച്ചതാണെന്നും അതിൽ ഒരു സത്യവുമില്ലെന്നും അവർ വ്യക്തമാക്കി. ട്വിറ്ററിലൂടെയാണ് ശബാന ആസ്മി ഇക്കാര്യം അറിയിച്ചത്.

ഇത്തരത്തിലൊരു പരാമർശവും ഞാൻ നടത്തിയിട്ടില്ല. ഇന്ത്യ വിട്ടു പോകാൻ ഞാൻ ആഗ്രഹിക്കുന്നുമില്ല. ഞാൻ ജനിച്ചതിവിടെയാണ്. ഇവിടെ തന്നെയാണ് ഞാൻ മരിക്കേണ്ടത്- ശബാന ആസ്മി ട്വിറ്ററിൽ വ്യക്തമാക്കിയിരിക്കുന്നു. ഇതിൽ കൂടുതലൊന്നും പറയാനില്ലെന്നും ഈ വാർത്തയെ അപലപിക്കുന്നുവെന്നും അവർ പറഞ്ഞു.

വാർത്തകൾ പ്രചരിപ്പിക്കുന്നവരോട് സഹതാപം മാത്രം. പ്രശ്നങ്ങളെ കുറിച്ച് അവർ സംസാരിക്കാത്തിടത്തോളം അവർ നുണ പ്രചരിപ്പിക്കും. അത് സത്യമാണെന്ന് ജനങ്ങൾ വിശ്വസിക്കും- അവർ വ്യക്തമാക്കി. താരത്തിൻറെ ചിത്രത്തിനൊപ്പം ഒരു ഫേസ്ബുക്ക് അക്കൗണ്ടിൽ നിന്നാണ് ഇത്തരത്തിലൊരു വാർത്ത പ്രചരി‌ച്ചത്.