ഷൂട്ടിങ്ങിനിടെ അവിചാരിതമായി ഒളിമ്പ്യൻ ശ്രീജേഷിനെ കണ്ടുമുട്ടി സംവിധായകൻ ഷാജി കൈലാസ്

ഷൂട്ടിംഗ് തിരക്കിനിടെ ഭക്ഷണം കഴിക്കാൻ പോയ ഇടവേളയിൽ ഒളിമ്പ്യൻ ശ്രീജേഷിനെ കണ്ടുമുട്ടിയ വിശേഷവുമായി സംവിധായകൻ ഷാജി കൈലാസ്. അദ്ദേഹം ഫേസ്ബുക്ക് പോസ്റ്റിൽ ചിത്രങ്ങളും കുറിപ്പും പോസ്റ്റ് ചെയ്യുകയും ചെയ്‌തു. "അവിചാരിതം... മനോഹരം... അതൊരു അപ്രതീക്ഷിത കാഴ്ചയായിരുന്നു. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച് മോഹൻലാലിനെ നായകനാക്കി ഞാൻ സംവിധാനം നിർവഹിക്കുന്ന ചിത്രത്തിന്റെ ഷൂട്ടിങ്ങ് പാലക്കാട് കുതിരാൻ ഭാഗത്ത് നടക്കുന്നു...

'ഭക്ഷണം കഴിക്കാൻ ഹോട്ടലിൽ കയറുമ്പോഴാണ് ശ്രീ പി ആർ ശ്രീജേഷ് കയറിവരുന്നത്... കൂടെ സ്നേഹമുള്ള കുടുംബവും. ഒളിംപിക്‌സിൽ മെഡൽ നേടിയ മലയാളി.. ഇന്ത്യൻ ഹോക്കിയുടെ ഗോൾവല കാത്ത അതുല്യപ്രതിഭ.. പരസ്പരം കണ്ടപ്പോൾ, സംസാരിച്ചപ്പോൾ, അടുത്ത് നിന്ന് ഫോട്ടോക്ക് പോസ് ചെയ്തപ്പോൾ അതൊരു അഭിമാനത്തിന്റെ നിമിഷമായി മാറി... (തുടർന്ന് വായിക്കുക)

'ശ്രീജേഷിനെ കണ്ടതും സംസാരിക്കാൻ പറ്റിയതും മഹാഭാഗ്യമായി കരുതുന്നു. ഈ കായികതാരം ഇനിയും ഉയരങ്ങൾ കീഴടക്കട്ടെ.. മലയാളിയുടെ പേരും പെരുമയും സഹ്യൻ കടന്ന്, കടൽ കടന്ന് ലോകമെമ്പാടും എത്തട്ടെ... നന്ദി ശ്രീജേഷ്... അങ്ങേക്ക് വേണ്ടി ഏതൊരു കയികപ്രേമിയേയും പോലെ ഞാനും പ്രാർത്ഥിക്കുന്നു... ചക് ദേ ഇന്ത്യ..."

2009ലെ റെഡ് ചില്ലീസിനു ശേഷം മോഹൻലാൽ, ഷാജി കൈലാസ് കൂട്ടുകെട്ടിൽ ഒരുങ്ങുന്ന സിനിമയാണിത്. രാജേഷ് ജയറാം തിരക്കഥ രചിക്കും. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ചിത്രം നിർമ്മിക്കും