ഷക്കീലയും ഡിജിറ്റൽ പ്ലാറ്റുഫോമിലേക്ക്‌; റിലീസ് ഉടനെയെന്ന് പ്രതീക്ഷ

കോവിഡ് പ്രതിസന്ധിയിൽ താഴുവീണ സിനിമാശാലകളിൽ നിന്നും ഡിജിറ്റൽ പ്ലാറ്റുഫോമിന്റെ വെളിച്ചത്തിലേക്ക് കടക്കാൻ ഷക്കീല. ഒരുകാലത്ത് മാദക സൗന്ദര്യംകൊണ്ട് സ്‌ക്രീനുകളെ അടക്കിവാണ ഷക്കീലയുടെ ജീവിതകഥ പറയുന്ന ബോളിവുഡ് ചിത്രമായ 'ഷക്കീല' ഒ.ടി.ടി. പ്ലാറ്റുഫോം വഴി ഡിജിറ്റൽ റിലീസിനെത്തുന്നു എന്ന് സൂചന

ഇന്ദ്രജിത് ലങ്കേഷ് സംവിധാനം ചെയ്ത ചിത്രം റിലീസ് ചെയ്യാനായി ഡിജിറ്റൽ പ്ലാറ്റുഫോമുകളുമായി ചർച്ചയിലാണ് എന്നാണ് ഒടുവിൽ കിട്ടുന്ന വിവരം. റിച്ച ഛദ്ദയാണ് ഷക്കീലയായി വേഷമിടുക. 2019 വേനൽക്കാലത്ത് റിലീസ് പ്രതീക്ഷിച്ചെങ്കിലും നടന്നില്ല

മേലാടകൾക്കു പകരം മെയ് നിറയെ സ്വർണാഭരണങ്ങൾ കൊണ്ട് മൂടിയ റിച്ച ഛദ്ദയാണ് ചിത്രത്തിന്റെ ഫസ്റ്റ് ലുക്കിൽ പ്രത്യക്ഷപ്പെട്ടത്. ഒപ്പം 'നോട് എ പോൺ സ്റ്റാർ' എന്ന അടിക്കുറിപ്പും

റിച്ചയുടെ കാമുകനായി മലയാളി താരം രാജീവ് പിള്ളയും എത്തും. ഷക്കീല അതിഥി താരമായി വേഷമിടുന്നുണ്ട്

കർണാടക കേന്ദ്രീകരിച്ചായിരുന്നു ഏറിയ പങ്ക് ചിത്രീകരണവും. ചിത്രത്തിനായി റിച്ച ബെല്ലി ഡാൻസ് പരിശീലനം നേടിയിരുന്നു

അശ്‌ളീല ചിത്രങ്ങളിലെ നായികെയെന്ന പരിവേഷത്തിനു പുറത്തു ഷക്കീലയെ അവതരിപ്പിക്കുകയാണ് ചിത്രം. ദാരിദ്ര്യത്തിൽ നിന്നും ജീവിതവിജയത്തിലേക്ക് കുതിച്ചു പൊങ്ങി, ജീവിതത്തിലെ സകല സുഖ സൗകര്യങ്ങളും അനുഭവിച്ചു ഉയർച്ചയുടെയും, പതനത്തിന്റെയും അവസ്ഥയിലൂടെ ഒരുപോലെ കടന്നുപോയ കഥയാണ് ഷക്കീലയിലൂടെ ആവിഷ്‌കരിക്കുന്നത്

ഇതിനു മുൻപ് ഇത്തരമൊരു കഥ പറഞ്ഞത് ഡേർട്ടി പിക്ച്ചറിലൂടെ മിലൻ ലുത്രിയ ആയിരുന്നു. അന്നും തെന്നിന്ത്യയിലെ മാദക റാണിയായിരുന്നു പരാമർശം. സിൽക്ക് സ്മിതയുടെ വേഷത്തിലെത്തിയതാകട്ടെ മലയാളിയായ വിദ്യ ബാലൻ

വിദ്യക്ക് കരിയർ ബ്രേക്ക് നൽകി എന്നത് കൂടാതെ വൻ ജനശ്രദ്ധയും വിമർശക പ്രിയവുമായി മാറിയ ചിത്രമാണിത്. സിൽക്കും ഷക്കീലയും ഒരു കാലത്ത് ചലച്ചിത്ര രംഗത്ത് ഒന്നിച്ചു പ്രവർത്തിച്ചിട്ടുണ്ട്