'ഷൈൻ ടോം ചാക്കോ ഒരുപാട് മാറിപ്പോയി'; അത്ഭുതം തോന്നുന്നുവെന്ന് നടി അനുശ്രീ

കൊച്ചി: സിനിമാ പ്രൊമോഷൻ ചടങ്ങുകളിൽ അഭിമുഖങ്ങളിലും ഷൈൻ ടോം ചാക്കോ നടത്തുന്ന പരാമർശങ്ങൾ വൈറലാകാറുണ്ട്. ഷൈൻ ടോം ചാക്കോയ്ക്ക് ഉണ്ടായ മാറ്റത്തെക്കുറിച്ച് സംസാരിക്കുകയാണ് നടി അനുശ്രീ. ഷൈന്‍ ടോം ചാക്കോ ഇന്റര്‍വ്യൂവില്‍ സംസാരിക്കുന്നത് കാണുമ്ബോള്‍ മറ്റൊരാളാണെന്ന് തോന്നുന്നുവെന്ന് അനുശ്രീ പറയുന്നു.

'ഷൈന്‍ ഇപ്പോള്‍ വലിയ സംഭവമായി മാറി. ഇന്റര്‍വ്യൂസില്‍ ഒക്കെ ഷൈനിനെ കാണുമ്ബോള്‍ ഒരുപാട് മാറിപ്പോയോ എന്ന് ചിന്തിക്കും. കാരണം ഞങ്ങള്‍ ഇതിഹാസയില്‍ അഭിനയിക്കുന്ന സമയത്ത് ഷൈൻ ആവശ്യമില്ലാതെ സംസാരിക്കുന്നത് പോലും ഞാന്‍ കണ്ടിട്ടില്ല.

'അന്നൊക്കെ ദൈവമേ ഈ ചേട്ടന്‍ എന്താ ഇങ്ങനെ എന്ന് ഞാന്‍ ഓര്‍ത്തിട്ടുണ്ട്. ഭയങ്കര പാവം ആയ ഒരു മനുഷ്യന്‍. വണ്ടിയില്‍ കേറിയിരുന്നാലും അതില്‍ പോയിരുന്നു ഉറങ്ങുന്നത് ഒക്കെ കാണാം. ഷോട്ട് റെഡി ആവുമ്ബോള്‍ വന്നു അഭിനയിച്ചിട്ട് പോകും'- ഷൈൻ ടോം ചാക്കോയെക്കുറിച്ച് അനുശ്രീ പറയുന്നു.

ഇതിഹാസ എന്ന സിനിമയില്‍ പുകവലിക്കുന്ന സീന്‍ ഒക്കെ ഉണ്ട്. തന്നെ പുകവലിക്കാന്‍ പഠിപ്പിക്കുന്നത് ബാലുവും ഷൈനും ആയിരുന്നുവെന്നും അനുശ്രീ പറയുന്നു.

'അക്കാലത്ത് പ്രൊമോഷന് വേണ്ടി ഒക്കെ ഞാൻ സംസാരിക്കുന്ന സമയത്ത് പോലും ഭയങ്കര ലൈറ്റ് ആയിട്ടും മൈല്‍ഡ് ആയിട്ടും ഒക്കെ സംസാരിക്കുന്ന ആളായിരുന്നു ഷൈൻ ടോം ചാക്കോ. ഇപ്പൊ പുള്ളി കൗണ്ടര്‍ ഒക്കെ അടിച്ച്‌ ഭയങ്കര മാറ്റത്തില്‍ ഒക്കെ നടക്കുന്നത് കാണുമ്ബോള്‍ അത്ഭുതം തോന്നുന്നു'- അനുശ്രീ പറഞ്ഞു.