Supriya-Srinidhi | ശ്രീനിധിയെ സുപ്രിയ മേനോന്‍ അവഗണിച്ചോ? സോഷ്യല്‍ മീഡിയയില്‍ വിമര്‍ശനവും പിന്തുണയും

കെജിഎഫ് 2ന്റെ പ്രമോഷനായി കൊച്ചിയില്‍ വെച്ച് നടന്ന ചടങ്ങില്‍ നായിക ശ്രീനിധി ഷെട്ടിയെ നിര്‍മ്മാതാവ് സുപ്രിയ മോനോന്‍ അവഗണിച്ചെന്ന തരത്തിലുള്ള വിമര്‍ശനങ്ങളാണ് ഇപ്പോള്‍ സമൂഹമാധ്യമങ്ങളില്‍ ചൂടുള്ള ചര്‍ച്ചയ്ക്ക് വഴിയൊരുക്കിയത്. എന്നാല്‍ സുപ്രിയയെ പിന്തുണച്ചും വിമര്‍ശിച്ചും നിരവധി പേര്‍ രംഗത്തെത്തി.

പ്രസ് മീറ്റിനിടെ സിനിമയിലെ നായിക ശ്രീനിധിക്ക് സുപ്രിയ ഹസ്തദാനം ചെയ്യാതിരുന്നതാണ് വിവാദമായത്. ശ്രീനിധിയെ അവഗണിച്ച് നായകനായ യഷിന് ഹസ്തദാനം ചെയ്ത സുപ്രിയയുടെ പ്രവര്‍ത്തി മനഃപൂര്‍വമാണെന്നായിരുന്നെന്നായിരുന്നു വിമര്‍ശനം.

യഷും ശ്രീനിധിയും ഇരിക്കുന്ന വേദിയില്‍ എത്തിയ സുപ്രിയ മേനോന്‍ യഷിന് ഹസ്തദാനം നടത്തിയ ശേഷം നടന്നു നീങ്ങി. പിന്നാലെ വന്ന ശങ്കര്‍ രാമകൃഷ്ണനും യഷിന് കൈകൊടുത്ത് നടന്നു നീങ്ങുകയായിരുന്നു. എന്നാല്‍ ശ്രീനിധിയും സുപ്രിയയും ഒന്നിച്ചാണ് വേദിയിലേക്ക് എത്തിയതെന്ന് വിമര്‍ശകര്‍ക്ക് മറുപടിയുമായി അധികൃതര്‍ രംഗത്തെത്തി.

അതേസമയം വേദിയിലെത്തും മുന്‍പ് സുപ്രിയയും ശ്രീനിധിയും തമ്മില്‍ സംസാരിക്കുന്നതിന്റെ ചിത്രങ്ങളും പുറത്ത് വന്നിരുന്നു. എന്നാല്‍ വേദിയില്‍ കാണിക്കേണ്ട മര്യാദ ഉണ്ടെന്നും അത് കാണിക്കണമായിരുന്നെന്നുമാണ് മറ്റൊരു വിമര്‍ശനം ഉയരുന്നത്.

വേദിയില്‍ യാഷിനൊപ്പമുള്ള ചിത്രങ്ങള്‍ സുപ്രിയ ഇന്‍സ്റ്റഗ്രാമില്‍ സ്റ്റാറ്റാസാക്കുകയും ചെയ്തു. ഇതിനെതിരെയും വിമര്‍ശനങ്ങള്‍ ഉയരുന്നുണ്ട്. ഇന്‍സ്റ്റാഗ്രാമില്‍ യഷിനും ശ്രീനിധിയ്ക്കുമൊപ്പമുള്ള ചിത്രവും സുപ്രിയ പങ്കുവെച്ചിട്ടുണ്ട്.

വേദിയിലേക്ക് സുപ്രിയയും ശ്രീനിധിയും ഒന്നിച്ചാണ് എത്തിയത്. പരിപാടിയിലേക്ക് വൈകിയെത്തിയ യഷിനെ സുപ്രിയ വേദിയില്‍ വെച്ചാണ് കാണുന്നത്. തുടര്‍ന്നാണ് സുപ്രിയ യഷിന് ഹസ്തദാനം നല്‍കിയത് എന്ന് പരിപാടിയില്‍ പങ്കെടുത്തവര്‍ വ്യക്തമാക്കുന്നു.