Sudev Nair | എനിക്ക് പകർച്ചവ്യാധി ഇല്ലെന്ന് തെളിയിക്കാൻ വീഡിയോ കാണിക്കേണ്ടി വന്നു; പോസ്റ്റുമായി സുദേവ് നായർ

നടൻ സുദേവ് നായർ (Sudev Nair) ഇന്നിപ്പോൾ മലയാള സിനിമയിൽ ആമുഖം ആവശ്യമില്ലാത്ത അഭിനേതാവായി മാറിക്കഴിഞ്ഞു. ഒന്നിനുപിറകെ ഒന്നെന്ന നിലയിൽ സിനിമകളിൽ അഭിനയിക്കാറില്ലെങ്കിലും, ശ്രദ്ധിക്കപ്പെടുന്ന വേഷങ്ങൾ സുദേവ് മലയാള സിനിമയിൽ ചെയ്യാറുണ്ട്. പലപ്പോഴും ആക്ഷൻ, ആയോധനകലകൾ എന്നിവ ആവശ്യമുള്ള സിനിമകളിൽ ഒഴിച്ചുകൂടാൻ കഴിയാത്ത താരമാണ് ഈ മുംബൈ മലയാളി

അടുത്തിടെ പുറത്തിറങ്ങിയ മമ്മൂട്ടി ചിത്രം ഭീഷ്മപർവ്വത്തിൽ മുംബൈ മലയാളിയായിട്ടായിരുന്നു സുദേവിന്റെ അവതരണം. രാജൻ മാധവൻ നായർ എന്ന അധോലോക നായകന്റെ വേഷം സുദേവ് ഭംഗിയായി അഭിനയിച്ച് ഫലിപ്പിച്ചു. നെഗറ്റീവ് വേഷത്തിൽ അടുത്തിടെ പുറത്തിറങ്ങിയ സുദേവിന്റെ രണ്ടാമത്തെ ചിത്രമാണ് 'ഭീഷ്മപർവ്വം'. എന്നാലിപ്പോൾ സുദേവ് ഇൻസ്റ്റഗ്രാമിൽ ഒരു പോസ്റ്റ് ഇടേണ്ട സാഹചര്യം ഉണ്ടായിരിക്കുന്നു. തന്റെ ഉള്ളംകൈയിൽ നിന്നും തൊലിയടർന്നു പോയ ചിത്രങ്ങൾ സഹിതമാണ് പോസ്റ്റ് (തുടർന്നു വായിക്കുക)

വിമാനത്തിൽ കയറിയപ്പോൾ താൻ പുതിയ വൈറസ് വകഭേദമൊന്നും പേറുന്നില്ല എന്ന് ഉറപ്പുവരുത്താൻ ഒരു വീഡിയോ കാണിക്കേണ്ടി വന്നു എന്ന് സുദേവ്. ഇദ്ദേഹത്തിന്റെ ഒരു പ്രധാന ജീവിതചര്യ തന്നെയാണ് അതിന് കാരണം

ജിമ്മിൽ ഡെഡ് ഹാങ്ങ് പുൾ അപ്പ് വർക്ഔട്ട് ചെയ്താണ് സുദേവിന്റെ കൈകൾ ഇങ്ങനെയായത്. മികച്ച ഫിറ്റ്നസിന് അഭിനന്ദനം ലഭിക്കുന്നത് സന്തോഷമാണെങ്കിലും, അതിന് പിന്നിലെ കഠിനാധ്വാനം വേദനരഹിതമല്ല എന്ന് തെളിയിക്കുകയാണ് സുദേവ്

ഇരുമ്പ് കമ്പിയിൽ തൂങ്ങിയാടിയ ശേഷം തൊലിയിളകി വന്ന തന്റെ കയ്യുടെ ഉള്ളിലെ ചിത്രമാണ് സുദേവ് ഇവിടെ പോസ്റ്റ് ചെയ്തിട്ടുള്ളത്. മുൻപ് താൻ സിനിമയിൽ നടത്തുന്ന പ്രയത്നങ്ങളുടെ ഫലം എങ്ങനെയാണെന്നതിനെക്കുറിച്ചും സുദേവ് പോസ്റ്റ് ഇട്ടിട്ടുണ്ടായിരുന്നു

'വൺ' സിനിമയിൽ കുടിലബുദ്ധിയായ എം.പി. ദിനേശ് രാജൻ എന്ന കഥാപാത്രവും സുദേവ് ഭംഗിയായി ചെയ്തിരുന്നു. മലയാളത്തിലെ കന്നിചിത്രം 'മൈ ലൈഫ്പാർട്ണർ'ലെ അഭിനയത്തിന് സുദേവ് മികച്ച നടനുള്ള സംസ്ഥാന പുരസ്‌കാരം നേടിയിരുന്നു