Suhana Khan| നെറ്റ്ഫ്ലിക്സ് ചിത്രത്തിലൂടെ ഷാരൂഖിന്റെ മകൾ അഭിനയ രംഗത്തേക്ക്; സുഹാന ഖാന്റെ ആദ്യ ചിത്രത്തെ കുറിച്ച്

ഒരു സിനിമയിൽ പോലും അഭിനയിച്ചിട്ടില്ലെങ്കിലും ബോളിവുഡിൽ(Bollywood)ഒരുപാട് ആരാധകരുള്ള താരപുത്രിയാണ് സുഹാന ഖാൻ (Suhana Khan). അച്ഛന്റെ പാത പിന്തുടർന്ന് സുഹാന എന്നാണ് സിനിമയിലേക്ക് എന്നാണ് ആരാധകരുടെ ചോദ്യം.

ഏറ്റവും പുതിയ വാർത്തകൾ അനുസരിച്ച് സുഹാന ഖാൻ തന്റെ ആദ്യം ചിത്രത്തിനുള്ള ഒരുക്കത്തിലാണ്. ഇന്ത്യ ടുഡേ റിപ്പോർട്ട് പ്രകാരം നെറ്റ്ഫ്ലിക്സ് ചിത്രത്തിലൂടെയാകും സുഹാനയുടെ ബോളിവുഡ് അരങ്ങേറ്റം.

സോയ അക്തർ സംവിധാനം ചെയ്യുന്ന ചിത്രത്തിലൂടെ ഒരുപിടി താരപുത്രന്മാരും പുത്രിമാരും ബോളിവുഡിൽ എത്തുന്നുവെന്ന് നേരത്തേ വാർത്തകളുണ്ടായിരുന്നു. ലോക പ്രശസ്തമായ ആർച്ചീ കോമിക്സിന്റെ ചലച്ചിത്ര ആവിഷ്കാരമാണ് സോയ അക്തർ ഒരുക്കുന്നത്.

ചിത്രത്തിൽ സുഹാനയുടെ കഥാപാത്രം ഏതാകുമെന്ന് വ്യക്തമല്ല. എങ്കിലും പാശ്ചാത്യ വേഷത്തിലും ഇന്ത്യൻ വേഷത്തിലും സുഹാന എത്തുമെന്നാണ് കരുതുന്നത്. ചുവപ്പ് സാരിയണിഞ്ഞ സുഹാനയുടെ ചിത്രങ്ങൾ അടുത്തിടെ ഇൻസ്റ്റഗ്രാമിൽ വൈറലായിരുന്നു.

കഴിഞ്ഞ വർഷമാണ് സോയാ അക്തർ തന്റെ നെറ്റ്ഫ്ലിക്സ് ചിത്രം പ്രഖ്യാപിച്ചത്. ആർച്ചീ ആൻഡ്രൂസ്, ബെറ്റി കൂപ്പർ, വെറോണിക്ക ലോഡ്ജ്, റെഗ്ഗി മാന്റിൽ, ജഗ്ഗ് ഹെഡ് എന്നു വിളിക്കുന്ന ഫോർസിത്ത് ജോൺസ് എന്നീ കൌമാരക്കാരെ പ്രധാന കഥാപാത്രങ്ങളായി അവതരിപ്പിക്കുന്ന ആർച്ചീ കോമിക്സ് പരമ്പര ലോകപ്രശസ്തമാണ്.