Suhant Singh Rajput Death Case | സുശാന്ത് കേസിൽ റിയ ചക്രവർത്തിയെ കണ്ടെത്താനായില്ലെന്ന് ബീഹാർ ഡിജിപി

പാറ്റ്ന: ബോളിവുഡ് നടൻ സുശാന്ത് സിംഗ് രജ്പുത്തിന്‍റെ മരണം സംബന്ധിച്ച അന്വേഷണവുമായി ബന്ധപ്പെട്ട് ചോദ്യം ചെയ്യാൻ നടി റിയ ചക്രവർത്തിയെ ഇതുവരെ കണ്ടെത്താനായിട്ടില്ലെന്ന് ബീഹാർ ഡിജിപി. കേസ് അന്വേഷണവുമായി ബന്ധപ്പെട്ട് പൊലീസ് സംഘം ബീഹാറിൽനിന്ന് മുംബൈയിൽ എത്തിയിരുന്നു.

തെളിവുകളുടെ അടിസ്ഥാനത്തിലാണ് ബീഹാർ പോലീസ് അന്വേഷണം മുന്നോട്ടുകൊണ്ടുപോകുന്നതെന്നും ആവശ്യമെങ്കിൽ മുതിർന്ന ഉദ്യോഗസ്ഥരെ ഇവിടെ നിന്ന് മുംബൈയിലേക്ക് അയക്കുമെന്നും ഡിജിപി പറഞ്ഞു. ശനിയാഴ്ച മാധ്യമപ്രവർത്തകരോട് സംസാരിക്കുകയായിരുന്നു ബിഹാർ ഡിജിപി.

മുംബൈയിലെത്തി അന്വേഷണം നടത്തുന്ന ബീഹാർ പോലീസ് സംഘം ഇതുവരെ സുഹൃത്തുക്കളെയും സഹപ്രവർത്തകരെയും അന്തരിച്ച നടന്റെ ബന്ധുക്കളെയും സന്ദർശിക്കുകയും അവരിൽ നിന്ന് നിരവധി സുപ്രധാന വിവരങ്ങൾ ശേഖരിക്കുകയും ചെയ്തിട്ടുണ്ട്.

മുംബൈയിലേക്ക് പോയ നാലംഗ ബീഹാർ പോലീസ് സംഘം സുശാന്തിന്റെ സഹോദരി, മുൻ കാമുകി അങ്കിത ലോഖണ്ഡെ, വീട്ടിലെ ജോലിക്കാരൻ, സുഹൃത്തുക്കൾ, സഹപ്രവർത്തകർ എന്നിവരുടെ മൊഴി രേഖപ്പെടുത്തിയിട്ടുണ്ട്. സുശാന്തിന്റെ ഇടപാടുകളെക്കുറിച്ചുള്ള വിവരങ്ങൾ ശേഖരിക്കുന്നതിനായി സംഘം ബാങ്കിലും പോയി. ബാങ്ക് അക്കൗണ്ടുകൾ പരിശോധിക്കുകയും ചെയ്തു.

അതേസമയം സംഭവവുമായി ബന്ധപ്പെട്ട് ചോദ്യം ചെയ്യേണ്ടിയിരുന്ന നടി റിയ ചക്രവർത്തിയെ ഇതുവരെ കണ്ടെത്താൻ ബീഹാർ പൊലീസ് സംഘത്തിന് സാധിച്ചിട്ടില്ല.

“ബിഹാർ പോലീസിന് ഈ കേസ് നന്നായി അന്വേഷിക്കാൻ കഴിയുന്നുണ്ട്. അന്വേഷണം ശരിയായ ദിശയിലാണ്. കേസ് സിബിഐ അന്വേഷിക്കണമെന്ന് സുശാന്തിന്റെ കുടുംബം ആഗ്രഹിക്കുന്നുവെങ്കിൽ, അത് പരിഗണിക്കപ്പെടണം, പക്ഷേ ബീഹാർ പോലീസ് സുശാന്തിന് നീതി ലഭ്യമാക്കാൻ ഏത് പരിധിവരെ വേണമെങ്കിലും പോകും. സുശാന്തിന്റെ ആത്മാവിനുവേണ്ടിയും അദ്ദേഹത്തിന്റെ കുടുംബത്തിന് നീതി ലഭ്യമാക്കാനും ബീഹാർ പോലീസിന് പൂർണ കഴിവുണ്ടെന്ന് ഞാൻ നിങ്ങൾക്ക് ഉറപ്പ് നൽകുന്നു- ഇക്കാര്യം സിബിഐ അന്വേഷിക്കണമെന്ന ആവശ്യത്തോട് പ്രതികരിച്ച ഡിജിപി പറഞ്ഞു,

ഇക്കാര്യത്തിൽ കേസ് രജിസ്റ്റർ ചെയ്യാൻ അധികാരപരിധിക്ക് പുറത്ത് പോകുന്നുവെന്ന ആരോപണത്തെക്കുറിച്ച് ചോദിച്ചപ്പോൾ, സുശാന്തിന്റെ പിതാവ് നൽകിയ പരാതിയിൽ പാറ്റ്നയിൽ കേസ് രജിസ്റ്റർ ചെയ്തിട്ടുണ്ടെന്ന് ഡിജിപി വ്യക്തമാക്കി, അതിനുശേഷം അന്വേഷണം ആരംഭിച്ചു. ഈ കേസിലെ ഒരു പ്രതി സുപ്രീം കോടതിയിൽ പോയിട്ടുണ്ട്. സുപ്രീം കോടതി പറയുന്നതെല്ലാം പിന്തുടരുമെന്നും ഇക്കാര്യം അന്വേഷിക്കാൻ ബീഹാർ പോലീസിന് അവസരം ലഭിച്ചാൽ സത്യം പുറത്തുവരുമെന്നും അദ്ദേഹം പറഞ്ഞു.

പട്‌ന സ്വദേശിയും പ്രശസ്ത ബോളിവുഡ് നടനുമായ സുശാന്ത് സിംഗ് രജ്പുതിനെ ജൂൺ 14 ന് മുംബൈയിലെ വസതിയിൽ ആത്മഹത്യ ചെയ്ത നിലയിൽ കണ്ടെത്തുകയായിരുന്നു. മുംബൈ പോലീസും സുശാന്തിന്‍റെ ആത്മഹത്യ അന്വേഷിക്കുന്നുണ്ട്.