തന്‍റെ ചിത്രവുമായി വ്യാജ പോസ്റ്ററുകൾ; പ്രൊഡക്ഷൻ കമ്പനിക്കെതിരെ പരാതി നൽകി സുനിൽ ഷെട്ടി

മുംബൈ: തന്‍റെ ഫോട്ടോ പതിപ്പിച്ച് വ്യാജ ഫിലിം പോസ്റ്റര്‍ പ്രചരിപ്പിച്ച പ്രൊഡക്ഷൻ കമ്പനിക്കെതിരെ പരാതിയുമായി ബോളിവുഡ് താരം സുനിൽ ഷെട്ടി. താരത്തിന്‍റെ അനുമതി കൂടാതെയാണ് പോസ്റ്ററിൽ ചിത്രം ഉൾപ്പെടുത്തിയിരിക്കുന്നതെന്നും ആചിത്രത്തിലെ കേന്ദ്രകഥാപാത്രം സുനില്‍ ഷെട്ടിയാണെന്ന് നുണകൾ പ്രചരിപ്പിക്കുന്നുവെന്നും ചൂണ്ടിക്കാട്ടിയാണ് പരാതി.

മുംബൈ വെർസോവ പൊലീസ് സ്റ്റേഷനിലാണ് ഇതുമായി ബന്ധപ്പെട്ട് സുനിൽ പരാതി നല്‍കിയിരിക്കുന്നതെന്നാണ് റിപ്പോർട്ട്. എന്നാൽ ഇതുവരെ എഫ്ഐആർ രജിസ്റ്റർ ചെയ്തിട്ടില്ലെന്നും താരത്തിന്‍റെ അടുത്തവൃത്തങ്ങളെ ഉദ്ധരിച്ച് റിപ്പോർട്ടുണ്ട്.

താൻ ഉള്‍പ്പെട്ടിട്ടില്ലാത്ത ഒരു ചിത്രത്തിൽ തന്‍റെ ഫോട്ടോ ഉൾപ്പെടുത്തി വ്യാജ പോസ്റ്ററുകളാണ് നിർമ്മാതാക്കൾ പ്രചരിപ്പിക്കുന്നതെന്നാണ് 59കാരനായ താരത്തിന്‍റെ ആരോപണം. സോഷ്യൽ മീഡിയയിൽ പോസ്റ്റർ വ്യാപകമായി പ്രചരിച്ചതോടെയാണ് സംഭവം പുറത്തറിയുന്നതും സുനിൽ നിയമ നടപടി സ്വീകരിച്ചതും.

വ്യാജ പോസ്റ്ററിന് പുറമെ തന്‍റെ പേരിൽ പലരിൽ നിന്നും ഇവർ പണം ആവശ്യപ്പെടുന്നുണ്ടെന്നും താരം ആരോപിക്കുന്നു. പ്രൊഡക്ഷൻ കമ്പനിയുടെ നീക്കം പൂർണ്ണമായ വഞ്ചന ആണെന്നാണ് സുനിൽ ആരോപിക്കുന്നത്.

പരാതി ലഭിച്ചിട്ടുണ്ടെന്ന വിവരം വെർസോവ സ്റ്റേഷൻ സീനിയർ ഇൻസ്പെക്ടർ സിറാജ് ഇനാംദാർ സ്ഥിരീകരിച്ചിട്ടുണ്ട്. ഇതുവരെ എഫ്ഐആർ ഫയൽ ചെയ്തിട്ടില്ല. അന്വേഷണം നടക്കുന്നുണ്ടെന്നാണ് അദ്ദേഹം വ്യക്തമാക്കിയത്.