Holi 2021| ഭർത്താവിനും മക്കൾക്കുമൊപ്പം ഹോളി ആഘോഷം; ചിത്രങ്ങൾ പങ്കുവെച്ച് സണ്ണി ലിയോണി

കുടുംബത്തിനൊപ്പം ഹോളി ആഘോഷിച്ച് സണ്ണി ലിയോണി. ഏറ്റവും മികച്ച ഹോളി എന്ന കുറിപ്പോടെയാണ് സണ്ണി സോഷ്യൽമീഡിയയിൽ ചിത്രങ്ങൾ പങ്കുവെച്ചിരിക്കുന്നത്. ചിത്രങ്ങളെല്ലാം സോഷ്യൽമീഡിയയിൽ വൈറലാണ്.

ഭർത്താവ് ഡാനിയൽ വെബ്ബറും മക്കളായ നിഷ, ആഷർ, നോഹയ്ക്കുമൊപ്പം സുഹൃത്തുക്കളുടെ കൂടെയായിരുന്നു ഹോളി ആഘോഷം. നീല നിറത്തിലുള്ള സൽവാറാണ് സണ്ണിയുടെ വേഷം.

അതേസമയം, മലയാളത്തിൽ നായികയായി എത്താനുള്ള ഒരുക്കത്തിലാണ് സണ്ണി ലിയോണി. ഈ ആഴ്ച്ചയാണ് ഷീറോ എന്ന ചിത്രത്തിന്റെ പ്രഖ്യാപനം കൊച്ചിയില്‍ നടന്നത്. കുട്ടനാടൻ മാർപാപ്പ എന്ന ചിത്രത്തിലൂടെ ശ്രദ്ധേയനായ സംവിധായകൻ ശ്രീജിത്ത് വിജയനാണ് സിനിമയുടെ സംവിധായകന്‍.

പുതിയ ചലച്ചിത്ര നിര്‍മ്മാണ കമ്പനിയായ ഇക്കിഗായ് മൂവീസിന്റെ ബാനറില്‍ അൻസാരി നെക്സ്റ്റൽ, രവി കിരൺ എന്നിവരാണ് ഷീറോയുടെ നിർമ്മാതക്കള്‍. സൈക്കോളജിക്കൽ ത്രില്ലർ വിഭാഗത്തിൽ പെടുന്ന ബിഗ് ബജറ്റ് ചിത്രമായിരിക്കും ഷീറോ. മലയാളത്തിന് പുറമേ, മറ്റ് ദക്ഷിണേന്ത്യൻ ഭാഷകളിലും ചിത്രം റിലീസ് ചെയ്യും.

നേരത്തേ, മമ്മൂട്ടി നായകനായ മധുരരാജയിൽ ഐറ്റം ഡാൻസിൽ സണ്ണി ലിയോണി അഭിനയിച്ചിരുന്നു. സണ്ണിയുടെ നായികയായി എത്തുന്ന ആദ്യ മലയാള ചിത്രത്തിനായുള്ള കാത്തിരിപ്പിലാണ് ആരാധകർ.

വീരമാദേവി, രംഗീല എന്നീ ചിത്രങ്ങളാണ് സണ്ണി ലിയോണിന്റെ ഏറ്റവും ഒടുവിൽ പുറത്തിറങ്ങിയ ചിത്രം. നവാസുദ്ദീൻ സിദ്ദീഖി നായകനായ ബട്ടിയാൻ ബുജാദോ എന്ന ചിത്രത്തിൽ ഗാനരംഗത്തും സണ്ണി എത്തുന്നുണ്ട്. വിക്രം ഭട്ട് സംവിധാനം ചെയ്യുന്ന വെബ് സീരീസാണ് സണ്ണിയുടെ ഇനി പുറത്തിറങ്ങാനുള്ള ചിത്രം.

കുടുംബത്തിനൊപ്പമുള്ള സന്തോഷകരമായ നിമിഷങ്ങളെല്ലാം സണ്ണി ലിയോൺ ആരാധകരുമായി പങ്കുവെക്കാറുണ്ട്. അടുത്തിടെ സണ്ണിയും മക്കളും എയർപോട്ടിൽ എത്തിയതിന്റെ ദൃശ്യങ്ങൾ സോഷ്യൽമീഡിയയിൽ വൈറലായിരുന്നു.

സണ്ണിയേയും മക്കളേയും സ്വീകരിക്കാനെത്തിയ വെബ്ബറിനടുത്തേക്ക് ആഹ്ളാദത്തോടെ ഓടിയെത്തുന്ന കുട്ടികളെ ദൃശ്യങ്ങളിൽ കാണാം.