സണ്ണി ലിയോണിക്ക് പ്രധാനം കുഞ്ഞുങ്ങളുടെ സുരക്ഷ; ലോക്ക്ഡൌണിനിടെ ഇന്ത്യവിട്ട് അമേരിക്കയിലേക്ക്

കൊറോണ പടർന്നുപിടിക്കുമ്പോൾ കുഞ്ഞുങ്ങളുടെ സുരക്ഷയ്ക്ക് അമേരിക്കയാണ് നല്ലതെന്ന് ബോളിവുഡ് താരം സണ്ണി ലിയോണി. ലോക്ക്ഡൌണിനിടെ കുടുംബത്തോടൊപ്പം അമേരിക്കയിലേക്ക് പോയ വിവരം അറിയിച്ചുകൊണ്ട് പങ്കുവെച്ച ഇൻസ്റ്റാഗ്രാം പോസ്റ്റിലാണ് താരം ഇക്കാര്യം പറഞ്ഞത്.

ഭർത്താവ് ഡാനിയൽ വെബ്ബറിനും മൂന്നു മക്കൾക്കുമൊപ്പമാണ് സണ്ണി ലിയോണി അമേരിക്കയിലേക്ക് പോയത്.

മാതൃദിന ആശംസകൾ നേർന്നു കൊണ്ടുള്ള ഇൻസ്റ്റാഗ്രാം പോസ്റ്റിലാണ് കുഞ്ഞുങ്ങളുടെ സുരക്ഷയെക്കുറിച്ചും അമേരിക്കൻ യാത്രയെക്കുറിച്ചും സണ്ണി ലിയോണി പരാമർശിച്ചിരിക്കുന്നത്.

ലോസ് ആഞ്ചൽസിലെ വീട്ടിലാണ് ഇപ്പോൾ സണ്ണിയും കുടുംബവും. മാതൃദിനത്തിൽ മക്കൾക്കൊപ്പമുള്ള ചിത്രം പങ്കുവെച്ചുകൊണ്ടാണ് താരം അമേരിക്കയിൽ എത്തിയ വിവരം ആരാധകരെ അറിയിച്ചത്.

'എല്ലാ അമ്മമാർക്കും മാതൃദിനാശംസകൾ. കുഞ്ഞുങ്ങൾ ജീവിതത്തിലേക്ക് വരുന്നതോടെ പ്രഥമ പരി​ഗണന അവരായി മാറുന്നു, മറ്റെല്ലാം പിന്നിലേക്ക് മാറും. അപകടകാരിയും അദൃശ്യനുമായ കൊലയാളി കൊറോണ വൈറസിൽ നിന്നും മക്കളെ രക്ഷിക്കാനുള്ള അവസരം എനിക്കും ഡാനിയേലിനും ലഭിച്ചു. ലോസ് ആഞ്ചലസിലുള്ള വീട്ടിലേക്കു അവരെ എത്തിക്കാനായി. എന്റെ അമ്മയും ഇതുതന്നെ ഞാൻ ചെയ്യണമെന്നാകും ആ​ഗ്രഹിച്ചിട്ടുണ്ടാവുക. മിസ് യൂ അമ്മ'- സണ്ണി ലിയോണി കുറിച്ചു.

ഇന്ത്യയിലെ ഏറ്റവും വലിയ ഹോട്ട്സ്പോട്ടായി മുംബൈ മാറിയതോടെയാണ് സണ്ണി ലിയോണി അമേരിക്കയിലേക്ക് പോയത്. എന്നാൽ എപ്പോഴാണ്, എങ്ങനെയാണ് ഇവർ പോയതെന്നതിനെക്കുറിച്ച് ഒരു വിവരവുമില്ല.

കഴിഞ്ഞ ദിവസം പോലും മുംബൈയിലെ വീട്ടിൽനിന്നുള്ള വർക്കൌട്ട് വീഡിയോ സണ്ണി ലിയോണി പങ്കുവെച്ചിരുന്നു. അതുകൊണ്ടുതന്നെ പെട്ടെന്നുള്ള അമേരിക്കൻ യാത്ര ആരാധകരെ ശരിക്കും ഞെട്ടിച്ചിട്ടുണ്ട്.