Kaaval Movie| സുരേഷ് ഗോപിയുടെ ‘കാവല്‍’ റിലീസിംഗ് തീയതി പ്രഖ്യാപിച്ചു; ഫസ്റ്റ്ലുക്ക് പോസ്റ്റർ വിഷുവിന്
ചിത്രം തിയേറ്ററിൽ കാണുന്നതിനു വേണ്ടി മാത്രം അണിയിച്ചൊരുക്കിയതാണെന്നും ജനം എന്ന് തീയറ്ററിലെത്തുമോ അന്ന് സിനിമ റിലീസ് ചെയ്യുമെന്നും ഔദ്യോഗിക ഇൻസ്റ്റഗ്രാം പേജിലൂടെ താരം നേരത്തെ വ്യക്തമാക്കിയിരുന്നു.
പ്രഖ്യാപനം മുതൽ പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രമാണ് സുരേഷ് ഗോപിയുടെ കാവല്‍. കസബയ്ക്ക് ശേഷം നിതിന്‍ രഞ്ജി പണിക്കർ സംവിധാനം ചെയ്യുന്ന ചിത്രമാണിത്. സിനിമയുടെ ചിത്രീകരണം കഴിഞ്ഞ വർഷം അവസാനം പൂർത്തിയാക്കിയിരുന്നു. സിനിമ തീയറ്ററുകളിൽ തന്നെ റിലീസ് ചെയ്യുമെന്ന് അണിയറ പ്രവർത്തകർ നേരത്തെ അറിയിച്ചിരുന്നു. ഇപ്പോൾ സിനിമയുടെ റിലീസ് തീയതി പുറത്തുവിട്ടിരിക്കുകയാണ് സുരേഷ് ഗോപി.
ഇൻസ്റ്റഗ്രാം പേജിലൂടെയാണ് സുരേഷ് ഗോപി തീയതി വെളിപ്പെടുത്തിയത്. ജൂലൈ രണ്ടിന് സിനിമ തീയറ്ററുകളിൽ റിലീസ് ചെയ്യുമെന്നാണ് സുരേഷ് ഗോപി അറിയിച്ചിരിക്കുന്നത്. സിനിമയുടെ ഫസ്റ്റ് ലുക്ക് പോസ്റ്റർ ഏപ്രിൽ 14 വിഷുവിന് പുറത്തുവിടുമെന്നും സുരേഷ് ഗോപി പറയുന്നു. ചിത്രം തിയേറ്ററിൽ കാണുന്നതിനു വേണ്ടി മാത്രം അണിയിച്ചൊരുക്കിയതാണെന്നും ജനം എന്ന് തീയറ്ററിലെത്തുമോ അന്ന് സിനിമ റിലീസ് ചെയ്യുമെന്നും ഔദ്യോഗിക ഇൻസ്റ്റഗ്രാം പേജിലൂടെ താരം നേരത്തെ വ്യക്തമാക്കിയിരുന്നു.
ഹൈറേഞ്ച് പശ്ചാത്തലത്തിൽ രണ്ടു കാലഘട്ടത്തിന്റെ കഥ ദൃശ്യവൽക്കരിക്കുന്ന ഈ ചിത്രം ഒരു ആക്ഷൻ ഫാമിലി ഡ്രാമ ആയിരിക്കും. ചിത്രത്തിൽ സുരേഷ് ഗോപിക്കൊപ്പം സയാ ഡേവിഡ്, ഐ എം വിജയന്‍, അലന്‍സിയര്‍, പത്മരാജ് രതീഷ്, സുജിത് ശങ്കര്‍, സന്തോഷ് കീഴാറ്റൂര്‍, കിച്ചു ടെല്ലസ്, ബിനു പപ്പു, മോഹന്‍ ജോസ്, കണ്ണന്‍ രാജന്‍ പി ദേവ്, മുരുകന്‍, മുത്തുമണി തുടങ്ങിയവരും പ്രധാന വേഷത്തിലെത്തുന്നുണ്ട്.
2020 ജനുവരിയിൽ ചിത്രീകരണം ആരംഭിച്ച കാവൽ ലോക്ക് ഡൗണിനെ തുടർന്ന് നിർത്തിവെയ്ക്കുകയായിരുന്നു. പിന്നീട് ലോക്ഡൗൺ ഇളവുകൾ പ്രഖ്യാപിച്ചപ്പോൾ കോവിഡ‍് മാനനണ്ഡങ്ങൾ പാലിച്ച് ചിത്രീകരണം പൂർത്തിയാക്കിയിരുന്നു. ഗുഡ്‌വില്‍ എന്റര്‍ടെയ്ന്‍മെന്റിന്റെ ബാനറില്‍ ജോബി ജോർജ് ആണ് ചിത്രം നിര്‍മ്മിക്കുന്നത്. നിഖില്‍ എസ്. പ്രവീണ്‍ ഛായാഗ്രഹണവും രഞ്ജിന്‍ രാജ് സംഗീതവും ഒരുക്കുന്നു.
നേരത്തെ സുരേഷ് ഗോപിയുടെ പിറന്നാൾ ദിവസം കാവലിന്റെ ടീസർ അണിയറ പ്രവർത്തകർ പുറത്തു വിട്ടിരുന്നു. മികച്ച പ്രേക്ഷക സ്വീകാര്യതയായിരുന്നു ഇതിന് ലഭിച്ചത്. ഒരു ഇടവേളയ്ക്ക് ശേഷം അനൂപ് സത്യൻ സംവിധാനം ചെയ്ത വരനെ ആവശ്യമുണ്ട് എന്ന ചിത്രത്തിലൂടെയാണ് സുരേഷ് ഗോപി സിനിമയിലേയ്ക്ക് മടങ്ങി എത്തിയത്. ശോഭന, ദുൽഖർ സൽമാൻ, കല്യാണി പ്രിയദർശനും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരുന്നു. 2020 ആദ്യം പുറത്തിറങ്ങിയ ചിത്രം മികച്ച വിജയം നേടിയിരുന്നു.
