Suriya and Jyotika | വാക്സിൻ സ്വീകരിച്ച് സൂര്യയും ജ്യോതികയും; ചിത്രങ്ങൾ വൈറൽ

കോവിഡ് വാക്സിൻ സ്വീകരിച്ച് തമിഴ് സൂപ്പർ താരങ്ങളായ സൂര്യയും ജ്യോതികയും. ചെന്നൈയിലെ സ്വകാര്യ ആശുപത്രിയിൽ ഇന്നലെയാണ് ഇരുവരും എത്തി വാക്സിൻ ആദ്യ ഡോസ് സ്വീകരിച്ചത്. ഇതിന്റെ ചിത്രങ്ങൾ സൂര്യ തന്റെ സോഷ്യൽമീഡിയയിലൂടെ പങ്കുവെച്ചിട്ടുണ്ട്.

തന്റെ പുതിയ ചിത്രം നവരസയുടെ ലുക്കിലാണ് സൂര്യ വാക്സിൻ സ്വീകരിക്കാൻ എത്തിയത്. കോവിഡ് പ്രതിസന്ധിയെ തുടർന്ന് നിർത്തിവെച്ച സിനിമയുടെ ഷൂട്ടിങ് അടുത്ത മാസം ആരംഭിക്കുമെന്നാണ് പ്രതീക്ഷിക്കുന്നത്.

അടുത്തിടെ സൂര്യയ്ക്ക് കോവിഡ് ബാധിച്ചിരുന്നു. ഫെബ്രുവരിയിലായിരുന്നു സൂര്യയ്ക്ക് കോവിഡ് പോസിറ്റീവായത്. തുടർന്ന് ചെന്നൈയിലെ സ്വകാര്യ ആശുപത്രിയിൽ ചികിത്സയിലായിരുന്നു. പിന്നീട് വീട്ടിൽ ക്വാറന്റീനിലായ താരം രണ്ടാഴ്ച്ചയ്ക്ക് ശേഷമാണ് സുഖം പ്രാപിച്ചത്.

കഴിഞ്ഞ ദിവസം സൂര്യയുടെ സഹോദരനും നടുമായ കാർത്തിയും വാക്സിൻ സ്വീകരിച്ച ചിത്രം സോഷ്യൽമീഡിയയിൽ പങ്കുവെച്ചിരുന്നു.

പാണ്ഡിരാജ് സംവിധാനം ചെയ്യുന്ന പുതിയ ചിത്രത്തിലും സൂര്യയാണ് നായകൻ. ഇതിനു ശേഷം വെട്രിമാരൻ സംവിധാനം ചെയ്യുന്ന വാടി വാസൽ എന്ന ചിത്രത്തിലും സൂര്യ നായകനാകും. നെറ്റ്ഫ്ലിക്സ് ഒറിജിനൽ ആണ് നവരസ. ചിത്രത്തിൽ മലയാളി താരം പ്രയാഗ മാർട്ടിനാണ് സൂര്യയുടെ നായിക.

തമിഴിലെ പ്രശസ്തരായ ഒമ്പത് സംവിധായകർ ചേർന്ന് ഒരുക്കുന്ന ചിത്രത്തിലാണ് പ്രയാഗ സൂര്യയ്ക്കൊപ്പം അഭിനയിക്കുന്നത്. നവരസ എന്ന് പേരിട്ടിരിക്കുന്ന ആന്തോളജിയിൽ ഗൗതം മേനോൻ ഒരുക്കുന്ന ചിത്രത്തിലാണ് സൂര്യയും പ്രയാഗയും ഒന്നിച്ച് അഭിനയിക്കുന്നത്. കോപം, അനുകമ്പ, ധൈര്യം, വെറുപ്പ്, ഭയം, ചിരി, സ്നേഹം, സമാധാനം, ആശ്ചര്യം തുടങ്ങി ഒമ്പത് വികാരങ്ങളെ ആസ്പദമാക്കിയാണ് നവരസ ഒരുക്കുന്നത്.

മണിരത്നവും ജയേന്ദ്ര പഞ്ചപകേശനും ചേർന്നാണ് ചിത്രം നിര‍്മിക്കുന്നത്. അരവിന്ദ് സ്വാമി, ബിജോയ് നമ്പ്യാർ, കാർത്തിക് സുബ്ബരാജ്, കാർത്തിക് നരേൻ, കെ.വി. ആനന്ദ്, പൊൻറാം, രതീന്ദ്രൻ പ്രസാദ്, ഹലിത ഷമീം എന്നിവരാണ് മറ്റ് സംവിധായകര്‍.