Sushant Singh Rajput| സുശാന്ത് റിയയോട് അവസാനമായി സംസാരിച്ചത് ജൂൺ5ന്; രണ്ട് മിനിറ്റ് മാത്രം

അന്തരിച്ച ബോളിവുഡ് താരം സുശാന്ത് സിംഗ് രാജ് പുത് കാമുകി റിയ ചക്രബർത്തിയോട് അവസാനമായി സംസാരിച്ചത് മരിക്കുന്നതിന് ഒമ്പതു ദിവസം മുമ്പ്. അതും വളരെ കുറച്ച് സമയം മാത്രം. കോൾ ഡീറ്റെയിൽസ് റെക്കോർഡിലാണ് ഇക്കാര്യം വ്യക്തമായിരിക്കുന്നതെന്ന് ഐഎൻഎസ് റിപ്പോർട്ട് ചെയ്തിരിക്കുന്നു.

ജൂൺ അഞ്ചിനും ആറിനുമാണ് റിയയും സുശാന്തും തമ്മിൽ അവസാനമായി സംസാരിച്ചിരിക്കുന്നത്. ജൂൺ അഞ്ചിന് രണ്ട് തവണ സംസാരിച്ചിട്ടുണ്ട്. രണ്ട് മിനിറ്റിൽ താഴെയാണ് ഇരുവരും സംസാരിച്ചിരിക്കുന്നതെന്നും ഫോൺ രേഖകൾ വ്യക്തമാക്കുന്നു.

ജൂൺ അഞ്ചിന് രാവിലെ 8.19ന് സുശാന്ത് റിയയെ വിളിച്ചു. 114 സെക്കൻഡ് മാത്രമാണ് ഇരുവരും സംസാരിച്ചത്. അതിനു ശേഷം ജൂൺ ആറിന് രാവിലെ 9.59ന് റിയ സുശാന്തിനെ വിളിച്ചിട്ടുണ്ട്. മൂന്ന് സെക്കൻഡിലും താഴെയായിരുന്നു ഇരുവരുടെയും സംസാരം.

ജൂൺ ഒന്നു മുതൽ നാലു വരെ സുശാന്തും റിയയും തമ്മിൽ ഫോണിൽ സംസാരിച്ചിട്ടില്ലെന്നും രേഖകൾ വ്യക്തമാക്കുന്നുണ്ട്. മേയിൽ ഇരുവരും തമ്മിൽ 19 തവണ വിളിച്ചിട്ടുണ്ട്. ഇതിൽ ഏറ്റവും കൂടുതൽ സമയം സംസാരിച്ചത് മെയ് ഒമ്പതിനായിരുന്നു. അഞ്ചര മിനിട്ടാണ് ഇരുവരും തമ്മിൽ സംസാരിച്ചത്.

മെയ് ഒമ്പതിന് വൈകിട്ട് ആറ് മണി കഴിഞ്ഞ് റിയയാണ് സുശാന്തിനെ വിളിച്ചത്. 347 സെക്കൻഡുകൾ ഇവർ സംസാരിച്ചു. ഇതേ ദിവസം വൈകിട്ട് 4.22നും റിയ സുശാന്തിനെ വിളിച്ചിരുന്നു. 286 സെക്കന്റുകളാണ് ഇരുവരും സംസാരിച്ചത്. മെയ് മാസത്തിലെ ഇരുവരും തമ്മിലുള്ള മറ്റ് കോളുകൾ മൂന്ന് മിനിട്ട് മാത്രം ദൈർഘ്യമുള്ളവയാണ്.

ഏപ്രിലിൽ ഇരുവരും തമ്മിൽ ഫോണിൽ സംസാരിച്ചിട്ടേയില്ലെന്നും രേഖകൾ വ്യക്തമാക്കുന്നു. അതിനു മുമ്പ് ഇരുവരും തമ്മിൽ സംസാരിച്ചത് മാർച്ച് 23നായിരുന്നു. ഒരു മിനിട്ട് മാത്രമായിരുന്നു ഇത്.

ജൂൺ14നാണ് സുശാന്തിനെ മുംബൈയിലെ അപ്പാർട്ട്മെന്റിൽ തൂങ്ങി മരിച്ച നിലയിൽ കണ്ടെത്തിയത്. സംഭവവുമായി ബന്ധപ്പെട്ട് സുശാന്തിന്റെ കാമുകി റിയ ചക്രബർത്തിക്കും അവരുടെ കുടുംബാംഗങ്ങള്‍ക്കുമെതിരെ സുശാന്തിന്റെ അച്ഛൻ കെകെ സിംഗ് പാട്ന പൊലീസിൽ പരാതി നൽകിയിട്ടുണ്ട്.

ഇതിന്റെ അടിസ്ഥാനത്തിൽ സിബിഐയും എൻഫോഴ്സ്മെന്റ് ഡയറക്ടറേറ്റും കേസ് രജിസ്റ്റർ ചെയ്തിട്ടുണ്ട്. എൻഫോഴ്സ്മെന്റ് ഡയറക്ട്റേറ്റ് റിയയുടെ മൊഴി രേഖപ്പെടുത്തിയിട്ടുണ്ട്.