Fahadh Faasil | സോളമന്‍ മുതല്‍ അമര്‍ വരെ ; ഫഹദ് ഫാസിലിന്‍റെ കരിയറിലെ 10 വ്യത്യസ്ത കഥാപാത്രങ്ങള്‍

നായകനായി അരങ്ങേറ്റം കുറിച്ച ആദ്യ സിനിമ തന്നെ പരാജയപ്പെടുന്നു. പിന്നീട് നീണ്ട നാളുകള്‍ക്ക് ശേഷം ശക്തമായ തിരിച്ചുവരവിലൂടെ മലയാള സിനിമയുടെ യുവമുഖമായി മാറുക. കഥാപാത്രങ്ങളിലെ വ്യത്യസ്തകൊണ്ടും തീവ്രമായ അഭിനയ ശേഷികൊണ്ടും സിനിമാപ്രേമികളെ അംബരപ്പിച്ച ഫഹദ് ഫാസിലിന്‍റെ ജന്മദിനമാണ് ഇന്ന്. ആദ്യ സിനിമയായ കൈയ്യെത്തും ദൂരത്തില്‍ നിന്നും മലയന്‍കുഞ്ഞ് വരെ എത്തിനില്‍ക്കുന്ന ഫഹദിന്‍റെ അഭിനയ ജീവിതത്തിലെ 10 വ്യത്യസ്ത കഥാപാത്രങ്ങളെ കുറിച്ച് .

ആമേന്‍: ലിജോ ജോസ് പെല്ലിശേരിയുടെ സംവിധാനത്തില്‍ പുറത്തിറങ്ങിയ ആമേനിലെ ഫഹദ് അവതരിപ്പിച്ച സോളമന്‍ അന്നോളം അദ്ദേഹം കൈകാര്യം ചെയ്ത വേഷങ്ങളില്‍ നിന്ന് വ്യത്യസ്തമായിരുന്നു. ശോശന്നയെ പ്രണയിക്കുന്ന, പള്ളിയുടെ ബാന്റ് സംഘത്തില്‍ ക്ലാര്‍നെറ്റ് വായിക്കാന്‍ ആഗ്രഹിക്കുന്ന, ആരെയും എതിര്‍ത്ത് നില്‍ക്കാന്‍ കെല്‍പ്പില്ലാത്ത, നിഷ്‌കളങ്കനായ കുമരങ്കരിക്കാരനായ സോളമനെ ഇരുകൈയും നീട്ടി പ്രേക്ഷകര്‍ സ്വീകരിച്ചു.

 ഇയ്യോബിന്‍റെ പുസ്തകം; മാസ് കഥാപാത്രങ്ങളിലും വ്യത്യസ്ത പുലര്‍ത്തിയ ഫഹദ് കഥാപാത്രങ്ങളിലൊന്നാണ്  ഇയ്യോബിന്റെ പുസ്തകത്തിലെ അലോഷി.  ലുക്കിലും ഡയലോഗിലും ആക്ഷന്‍ രംഗങ്ങളിലും ഫഹദിന്റെ  മാസ്മരിക പ്രകടനം പ്രേക്ഷകര്‍ക്ക് കാണിച്ചുകൊടുത്ത ചിത്രമാണ് അമല്‍ നീരദിന്റെ സംവിധാനത്തിലെത്തിയ ഇയ്യോബിന്റെ പുസ്തകം. 

നോര്‍ത്ത് 24 കാതം : വിചിത്രമായ സ്വഭാവ ശീലങ്ങളുള്ള അടുക്കും ചിട്ടയും കൂടുതലുള്ള, സ്വാര്‍ത്ഥനായ  ഹരി . പ്രേക്ഷകനെ ഒരേ സമയം  വിസ്മയിപ്പിക്കുകയും രസിപ്പിക്കുകയും ചെയ്യുന്ന  നോര്‍ത്ത് 24 കാതം എന്ന ചിത്ര്രത്തിലെ ഈ കഥാപാത്രം ഫഹദിന്‍റെ അഭിനയ ജീവിതത്തിലെ മറ്റൊരു നിര്‍ണായകല കഥാപാത്രമായി മാറി.

അന്നയും റസൂലും : കാമുക വേഷങ്ങള്‍ പലരും പല വിധത്തില്‍ അഭിനയിച്ച് കണ്ടിട്ടുണ്ടെങ്കിലും അവരില്‍ നിന്നെല്ലാം വ്യത്യസ്തനായിരുന്നു റസൂല്‍. അന്നയെ അകമഴിഞ്ഞ് സ്നേഹിക്കുന്ന റസൂലിന്‍റെ പ്രണയഭാവങ്ങള്‍ അത്രമേല്‍ തീവ്രമായിരുന്നു. രാജീവ് രവി സംവിധാനം ചെയ്ത ചിത്രം ഫഹദിന്‍റെ കരിയറിലെ മറ്റൊരു നാഴികകല്ലായി മാറി.

തൊണ്ടിമുതലും ദൃക്സാക്ഷിയും : കണ്ണുകളാല്‍ കഥപറയുന്ന തൊണ്ടിമുതലിലെ കള്ളന്‍ പ്രസാദിനെ അത്രവേഗം മലയാളികള്‍ മറന്നുകാണില്ല. ഓരോ നോട്ടത്തിലും, ഡയലോഗിലും വരെ നിറഞ്ഞുനില്‍ക്കുന്ന അഭിനയ ചാരുതയാണ് മലയാളികളുടെ മനസ് കവര്‍ന്ന ഈ കള്ളന്‍ കാഴ്ചവെച്ചത്. ദിലീഷ് പോത്തന്‍റെ സംവിധാനം ചെയ്ത ചിത്രത്തിലെ ഫഹദിന്‍റെ പ്രകടനം ഏറെ ചര്‍ച്ചചെയ്യപ്പെട്ടു.

മഹേഷിന്‍റെ പ്രതികാരം:  ഇടുക്കിയിലെ മിടുക്കനായ ഫോട്ടോഗ്രാഫര്‍ മഹേഷ് ഭാവന. പ്രണയവും പ്രതികാരവും മാറിമറിയുന്ന ഒരു സാധാരണ ഇടുക്കികാരന്‍. നിഷ്കളങ്കത നിറഞ്ഞ  പെരുമാറ്റം കൊണ്ടും വശ്യമായ ഭാവങ്ങള്‍കൊണ്ടും ഫഹദ് മഹേഷ് ഭാവനയെ  അവിസ്മരണിയമാക്കി.

ഒരു ഇന്ത്യന്‍ പ്രണയകഥ: സത്യന്‍ അന്തിക്കാട് സംവിധാനം ചെയ്ത ഒരു ഇന്ത്യന്‍ പ്രണയകഥയില്‍ അധികാര മോഹിയായ യുവരാഷ്ട്രീയ നേതാവ് അയ്മനം സിദ്ധാര്‍ത്ഥനായി ഫഹദ് നിറഞ്ഞാടി. ഹാസ്യകഥാപാത്രങ്ങളും തനിക്ക് നന്നായി വഴങ്ങുമെന്ന് ഫഹദ് ഇതിലൂടെ തെളിയിച്ചു.

കുമ്പളങ്ങി നൈറ്റ്സ് : മലയാള സിനിമയില്‍ ഇത്രയധികം ട്രെന്‍ഡിങ്ങായി മാറി ഒരു കഥാപാത്രം അടുത്തകാലത്തുണ്ടായിട്ടില്ല. അതാണ് കുമ്പളങ്ങി നൈറ്റ്സിലെ ഷമ്മി. അനുനിമിഷം മാറിമറിയുന്ന ഭാവങ്ങള്‍. ചിരിപ്പിച്ചും ഭയപ്പെടുത്തിയും പ്രേക്ഷകനെ ഞെട്ടിച്ച സൈക്കോ ഷമ്മി ഫഹദിന്‍റെ കരിയറിലെ നിർണായക കഥാപാത്രമായി മാറി.

ട്രാന്‍സ്: മോട്ടിവേഷണല്‍ സ്പീക്കറായ വിജു പ്രസാദില്‍ നിന്ന് പാസ്റ്റര്‍ ജോഷ്വാ കാള്‍ട്ടനിലേക്കുള്ള പരകായ പ്രവേശം. അന്‍വര്‍ റഷീദ് സംവിധാനം ചെയ്ത ട്രാന്‍സ് അക്ഷരാര്‍ത്ഥത്തില്‍ ഫഹദ് ഫാസിലിന്‍റെ അഴിഞ്ഞാട്ടമായിരുന്നു. ഹൈ എനര്‍ജി വേണ്ടിയിരുന്ന ഈ കഥാപാത്രത്തിനായി വലിയ  തയാറെടുപ്പുകളാണ് ഫഹദ് നടത്തിയത്. ശാരീരികമായി ഏറ്റവുമധികം പരിശ്രമം നടത്തിയ കഥാപാത്രമായിരുന്നു ട്രാന്‍സിലെ ജോഷ്വ എന്നാണ് ഫഹദ് തന്നെ പറഞ്ഞിട്ടുള്ളത്.

വിക്രം: കമല്‍ഹാസന്‍, വിജയ് സേതുപതി എന്നി അഭിനയ സിംഹങ്ങള്‍ക്കൊപ്പം പിടിച്ചു നിന്ന ഫഹദിന്‍റെ അമര്‍. വേലൈക്കാരന്‍ ,പുഷ്പ തുടങ്ങിയ ചിത്രങ്ങളിലൂടെ അന്യഭാഷകളിലും ചുവടുറപ്പിച്ച ഫഹദിലെ നടനെ ഒരിക്കല്‍ കൂടി ഉറപ്പിച്ച് നിര്‍ത്തുന്ന പ്രകടനമായിരുന്നു വിക്രത്തിലെ അമര്‍ എന്ന കുറ്റാന്വേഷക കഥാപാത്രം.