ദൃശ്യം 2 ഒടിടി റിലീസ്: വിമർശകർ തന്നെക്കുറിച്ച് ചിന്തിച്ചില്ലെന്ന് ആന്റണി പെരുമ്പാവൂർ

ജിത്തു ജോസഫ്- മോഹൻലാൽ ചിത്രമായ ദൃശ്യം 2  ഒടിടി റിലീസ് ചെയ്യാനുള്ള തീരുമാനത്തെ വിമർശിക്കുന്നവർ തന്നെക്കുറിച്ച് ചിന്തിച്ചില്ലെന്ന് നിർമാതാവ് ആന്റണി പെരുമ്പാവൂർ. സ്വന്തം കാര്യം മാത്രമാണ് വിമർശകർ ചിന്തിച്ചതെന്നും അദ്ദേഹം പറഞ്ഞു. 

ലാഭമായിരുന്നു ലക്ഷ്യമെങ്കിൽ കുഞ്ഞാലി മരക്കാറിൻ്റെ സ്ഥാനത്ത് പത്ത് മോഹൻലാൽ ചിത്രം നിർമ്മിക്കാമായിരുന്നു. ദൃശ്യം 2 റിലീസുമായി ബന്ധപ്പെട്ട് തിയറ്ററുകളുമായി കരാർ ഉണ്ടായിരുന്നില്ല- ആന്റണി പെരുമ്പാവൂർ പറയുന്നു.

തിയറ്റർ ഉടമകളെ മോഹിപ്പിച്ച് കരാർ ഉണ്ടാക്കിയ ശേഷം അവരെ കബളിപ്പിച്ചെങ്കിൽ മാത്രമേ, ഞാൻ തെറ്റു ചെയ്തു എന്ന ആരോപണം ഉന്നയിക്കാൻ കഴിയൂ. ഒ.ടി.ടി. റിലീസിന് നൽകിയാൽ വലിയ ഗുണം ചെയ്യുന്ന ചിത്രമായിരുന്നു കുഞ്ഞാലി മരയ്ക്കാർ. അത് താൻ തീയറ്ററിൽ പ്രദർശിപ്പിക്കാനാണ് ഉദ്ദേശിക്കുന്നതെന്ന് മറക്കരുതെന്നും ആൻ്റണി പെരുമ്പാവൂർ പറയുന്നു.

കുഞ്ഞാലി മരയ്ക്കാർ ഒ.ടി.ടി.ക്ക് നൽകാതിരിക്കാൻ കാരണം എന്താണെന്നും തീയറ്ററുകാർ ആലോചിക്കണമെന്ന് അദ്ദേഹം സൂചിപ്പിച്ചു. ഈ സാഹചര്യത്തിൽ തിയറ്റർ ഉടമകളുടെ യോഗത്തിൽ ദൃശ്യം - 2 സംബന്ധിച്ച് ചർച്ച ചെയ്യില്ല. 

ദൃശ്യം 2 സംന്ധിച്ച് ഒരു ഉറപ്പും ആർക്കും നൽകിയിട്ടില്ല. മലയാളത്തിൽ ഒരു വലിയ സിനിമ നിർമ്മിക്കാൻ കഴിയുന്ന തുകയ്ക്കാണ് കുഞ്ഞാലി മരയ്ക്കാറിൻ്റെ ഓവർസീസ് കരാർ നൽകിയതെന്നും ആൻ്റണി പെരുമ്പാവൂർ പറഞ്ഞു.

തൻ്റെ സ്വപ്നങ്ങൾ കുഞ്ഞാലി മരയ്ക്കാറിലൂടെയാണ്. ദൃശ്യം - 2 കുഞ്ഞാലി മരയ്ക്കാറിനു വേണ്ടി ത്യജിച്ചതാണ്. ദൃശ്യം - 2 തീയറ്ററിൽ വരണം എന്ന് ആർക്കും ആഗ്രഹിക്കാം. പക്ഷേ ചിന്തിക്കാതെയാണ് തന്നെ ചിലർ വിമർശിച്ചതെന്നും ആൻറണി പെരുമ്പാവൂർ പറഞ്ഞു.

ആമസോൺ  പ്രൈമുമായി ഉണ്ടാക്കിയ കരാറിൽനിന്ന് പിന്മാറാനാവില്ല. തീരുമാനങ്ങൾക്ക് മോഹൻലാലിൻ്റെയും ജിത്തു ജോസഫിൻ്റെയും പിന്തുണയുണ്ട്. തൻ്റെ തന്നെ ബിഗ് ബജറ്റ് ചിത്രമായ കുഞ്ഞാലി മരയ്ക്കാർ തിയറ്ററുകളിൽ റിലീസ് ചെയ്യും.- ആന്റണി പെരുമ്പാവൂർ പറഞ്ഞു.