Valentine's Day 2022: ഈ പ്രണയദിനത്തിൽ ഉറപ്പായും കാണേണ്ട 7 തെന്നിന്ത്യൻ സിനിമകൾ

Valentine's Day 2022: ഇന്ന് ലോക പ്രണയദിനം. ഈ ദിനം ആഘോഷിക്കാൻ കമിതാക്കൾ തയ്യാറെടുത്തുകഴിഞ്ഞു. എന്നാൽ എല്ലാം പഴയതുപോലെയാകില്ല. കോവിഡ് നിയന്ത്രണങ്ങൾ കാരണം എല്ലാവർക്കും പുറത്തുപോയി പ്രണയദിനം ആഘോഷിക്കാനുള്ള സാഹചര്യമല്ല പല സ്ഥലങ്ങളിലും നിലവിലുള്ളത്. അതുകൊണ്ട് ഈ പ്രണയദിനത്തെ വീട്ടിലിരുന്ന് എങ്ങനെ വർണാഭമാക്കാമെന്നാണ് മിക്കവരും ചിന്തിക്കുന്നത്. ഇഷ്ടപ്പെടുന്ന ഒരാൾക്കൊപ്പം ഒരു റൊമാന്റിക് സിനിമ കാണുകയെന്നത് വാലന്‍റൈൻ ദിനത്തിലെ പ്രത്യേക സായാഹ്നത്തെ കൂടുതൽ വൈകാരികമാക്കി മാറ്റും. നിങ്ങൾക്ക് ഹൃദയസ്പർശിയായ ഒരു റൊമാന്റിക് സിനിമ ഇഷ്ടമാണോ എന്നാൽ ഈ ക്വാറന്റൈൻ സമയത്ത് ഭാഷാ ഭേദങ്ങൾക്ക് അപ്പുറം മികച്ച ചില തെന്നിന്ത്യൻ പ്രണയ സിനിമകൾ കാണുന്ന കാര്യം പരിഗണിക്കാം. അത്തരത്തിൽ ചില സിനിമകൾ നിർദേശിക്കുന്നു.

റോജ- മണിരത്‌നത്തിന്റെ ഇതുവരെയുള്ള മികച്ച സൃഷ്ടികളിൽ ഒന്നാണ് ഈ തമിഴ് ക്ലാസിക്, ഐഎംഡിബിയിൽ 8.2 റേറ്റിംഗ് ലഭിച്ചിട്ടുള്ള സിനിമയാണിത്. മണിരത്‌നത്തിന്റെ ഏറ്റവും മികച്ച പ്രണയകഥകളിൽ ഒന്നായി ഈ ചിത്രം കണക്കാക്കപ്പെടുന്നു.

ആര്യ- അല്ലു അർജുന്റെ ആര്യ 2004 ലെ ബ്ലോക്ക്ബസ്റ്റർ ഹിറ്റായിരുന്നു, കൂടാതെ ഐഎംഡിബിയിൽ 7.8 റേറ്റിങ് നേടി. ഈ തെലുങ്ക് ചിത്രത്തിലെ അല്ലു അർജുന്‍റെ പ്രകടനം പെൺകുട്ടികളെ പ്രണയതീരത്തേക്ക് എത്തിക്കും എന്നതിൽ സംശയമില്ല.

കുമ്പളങ്ങി നൈറ്റ്സ്- 2019 ലെ ഈ മലയാളം ബ്ലോക്ക്ബസ്റ്റർ ഐഎംഡിബിയിൽ 8.6 റേറ്റിങ് നേടിയ സിനിമയാണ്. ഫഹദ് ഫാസിൽ പ്രധാന വേഷത്തിൽ എത്തുന്ന ഈ ചിത്രം പ്രണയത്തിന്‍റെ വ്യത്യസ്തതലങ്ങൾ ചിത്രീകരിച്ചിരിക്കുന്നു. ആമസോൺ പ്രൈമിലും സിനിമ ആസ്വദിക്കാം.

സമ്മോഹനം- ന്യൂജെൻ റൊമാന്റിക് ഡ്രാമയായ സമ്മോഹനം 2018-ലെ ഏറ്റവും വലിയ ഹിറ്റുകളിൽ ഒന്നായിരുന്നു. ഈ തെലുങ്ക് ബ്ലോക്ക്ബസ്റ്ററിൽ അദിതി റാവു ഹൈദരിയും സുധീർ ബാബുവും പ്രധാന വേഷങ്ങളിൽ എത്തുന്നു.

ഓം ശാന്തി ഓശാന- 2014-ലെ ഏറ്റവും വലിയ ഹിറ്റുകളിൽ ഒന്നായ ഈ മലയാള സിനിമ കേരള സംസ്ഥാന സർക്കാരിന്‍റെ മൂന്ന് ചലച്ചിത്ര അവാർഡുകൾ നേടിയിട്ടുണ്ട്. കൂടാതെ IMDb-യിൽ 7.7 റേറ്റിംഗുമുണ്ട്. ഡിസ്നി+ ഹോട്ട്‌സ്റ്റാറിൽ ആരാധകർക്ക് ഈ മധുരമാർന്ന പ്രണയകഥ ആസ്വദിക്കാം.

തട്ടത്തിൻ മറയത്ത്- വിനീത് ശ്രീനിവാസന്റെ തട്ടത്തിന് മറയത്ത് 2012 ലെ പ്രധാന ബ്ലോക്ക്ബസ്റ്ററുകളിൽ ഒന്നാണ്. ജാതിക്കും മതത്തിനും അതീതമായ പ്രണയമാണ് ചിത്രത്തിന്‍റെ ഇതിവൃത്തം.

ദിയ- നിരൂപക പ്രശംസ നേടിയ ഈ റൊമാന്റിക് ഡ്രാമ കന്നഡ സിനിമയാണ്. 2020-ലെ ഏറ്റവും വലിയ ബ്ലോക്ക്ബസ്റ്ററുകളിൽ ഒന്നാണിത്. ആമസോൺ പ്രൈമിൽ നിങ്ങളുടെ പങ്കാളിക്കൊപ്പം സിനിമ ആസ്വദിക്കാം.