'വന്ദനം' നായിക 34 വർഷത്തിനുശേഷം തിരികെ സിനിമയിലേക്ക്; ഗിരിജ ഷെട്ടാറിന്റെ മടങ്ങിവരവ് രക്ഷിത് ഷെട്ടിക്കൊപ്പം

വെറും രണ്ട് സിനിമകൾ കൊണ്ട് മാത്രം തെന്നിന്ത്യൻ സിനിമാ പ്രേക്ഷകരുടെ മനസ്സിൽ ഇടംനേടിയ നടിയാണ് ​ഗിരിജ ഷെട്ടാർ. വന്ദനം, ​ഗീതാഞ്ജലി എന്നീ ചിത്രങ്ങളിലൂടെ വൻ ആരാധകവൃന്ദം സൃഷ്ടിച്ച താരം പെട്ടന്നൊരു ദിവസം സിനിമാലോകത്തുനിന്ന് അപ്രത്യക്ഷമാവുകയായിരുന്നു. ഇപ്പോഴിതാ നീണ്ട വർഷങ്ങളുടെ ഇടവേളയ്ക്കുശേഷം ​ഗിരിജ സിനിമയിലേക്ക് തിരികെയെത്തുന്നു എന്നാണ് റിപ്പോർട്ട്.

കന്നഡയിലൂടെയാണ് ​ഗിരിജ ഷെട്ടാറിന്റെ മടങ്ങിവരവ്. രക്ഷിത് ഷെട്ടിയുടെ പരംവാ സ്റ്റുഡിയോസ് നിർമിക്കുന്ന 'ഇബ്ബനി തബ്ബിട ഇലെയാലി'യാണ് സിനിമ.

നവാ​ഗതനായ ചന്ദ്രജിത്ത് ബെളിയപ്പയാണ് സംവിധാനം. അതേസമയം ​ഗിരിജയുടെ വേഷം എന്താണ് എന്ന് പുറത്തുവിട്ടിട്ടില്ല. എങ്കിലും ഗിരിജയെ വീണ്ടും സ്ക്രീനിൽ കാണാൻ കാത്തിരിക്കുകയാണ് ആരാധകർ.

നടനും ഗായികയുമായ അങ്കിത അമരുമാണ് ചിത്രത്തിലെ പ്രധാന കഥാപാത്രത്തെ അവതരിപ്പിക്കുന്നത്. രക്ഷിത് ഷെട്ടിയുടെ റൈറ്റിംഗ് ടീമിന്റെ അസോസിയേറ്റായി പ്രവർത്തിച്ചയാളാണ് സംവിധായകൻ ചന്ദ്രജിത്ത് ബെളിയപ്പ.

കഥാ സം​ഗമ എന്ന ആന്തോളജി ചിത്രത്തിലെ ഒരു സെ​ഗ്മെന്റ് സംവിധാനം ചെയ്തത് ചന്ദ്രജിത്ത് ആണ്. വാലന്റൈൻസ് ഡേയോടനുബന്ധിച്ച് കഴിഞ്ഞ ദിവസം ലൊക്കേഷൻ ദൃശ്യങ്ങൾ അണിയറപ്രവർത്തകർ പുറത്തുവിട്ടിരുന്നു.