'എങ്ക ആട്ടം വെരിത്തനം' ഒരുദിവസംകൊണ്ട് ബിഗിൽ ട്രെയിലർ കണ്ടത് ഒന്നര കോടിയിലേറെ പേർ

ഒരു തട്ടുപൊളിപ്പൻ തമിഴ് സിനിമയ്ക്കുവേണ്ട എല്ലാ ചേരുവകളുമുണ്ട്. അതാണ് വിജയ് ചിത്രമായ ബിഗിൽ. കഴിഞ്ഞ ദിവസം പുറത്തിറങ്ങിയ ബിഗിൽ ട്രെയിലറിന് വമ്പൻ പ്രതികരണമാണ് ലഭിച്ചത്. ഒരുദിവസംകൊണ്ട് ഒരുകോടി എഴുപത് ലക്ഷത്തിലേറെ പേർ ബിഗിൽ ട്രെയിലർ കണ്ടുകഴിഞ്ഞു. എങ്ക ആട്ടം വെരിത്തനമായിരിക്കുമെന്ന പഞ്ച് ഡയലോഗാണ് ട്രെയിലറിൽ ഏറെ കൈയടി നേടുന്നത്.

ശനിയാഴ്ച വൈകിട്ട് ആറുമണിക്ക് പുറത്തിറങ്ങി ഒരുമണിക്കൂറിനകം ഒരുലക്ഷം പേർ ട്രെയിലർ കണ്ടു. ആറു മണിക്കൂർ ആയപ്പോൾ ബിഗിൽ ട്രെയിലർ കണ്ടവരുടെ എണ്ണം  പത്ത് ലക്ഷം കവിഞ്ഞു. 24 മണിക്കൂർ തികയുമ്പോൾ 16 ലക്ഷത്തിലേറെ പേർ ട്രെയിലർ വീഡിയോ യൂട്യൂബിൽ ലൈക്ക് ചെയ്തിട്ടുണ്ട്.

ഈ ദീപാവലി സീസണിൽ പുറത്തിറങ്ങുന്ന ബിഗിൽ എന്ന ചിത്രത്തിൽ വിജയ് ഇരട്ടവേഷത്തിലാണ് എത്തുന്നത്. നയൻതാരയാണ് ചിത്രത്തിലെ നായിക. തെരി, മെർസൽ എന്നീ ചിത്രങ്ങൾക്കുശേഷം വിജയ് നായകനാകുന്ന ആറ്റ്ലി ചിത്രമാണ് ബിഗിൽ.

ചിത്രത്തിൽ വനിതാ ഫുട്ബോൾ ടീം പരിശീലകനായാണ് വിജയ് അഭിനയിച്ചിരിക്കുന്നത്. വിജയ്, നയൻതാര എന്നിവർക്ക് പുറമെ ജാക്കി ഷിറോഫ്, വിവേക്, കതിർ, ഡാനിയൽ ബാലാജി, യോഗി ബാബു, വർഷ ബൊലമ്മ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിട്ടുണ്ട്. എ.ആർ. റഹ്മാനാണ് സംഗീതം ഒരുക്കിയിരിക്കുന്നത്.