'ഈ നടന് ഒപ്പം ഒരു വേഷം ചെയ്യണം' മാമുക്കോയയുടെ നടക്കാതെ പോയ ആഗ്രഹം ഇതായിരുന്നു

മലയാള സിനിമ രംഗത്ത് പകരം വെക്കാനില്ലാത്ത പ്രതിഭയ്ക്ക് ഉടമയായിരുന്നു നടന്‍ മാമുക്കോയ. തൊട്ടതെല്ലാം പൊന്നാക്കിയ അദ്ദേഹത്തിന്‍റെ സൗഹൃദവലയം വളരെ വിപുലമായിരുന്നു. വൈക്കം മുഹമ്മദ് ബഷീറും, എംടിയും എം.മുകുന്ദനും വി.ടി മുരളിയുമടക്കമുള്ള സാഹിത്യ സാംസ്കാരിക രംഗത്തെ പ്രമുഖരുമായുള്ള മാമുക്കോയയുടെ ചങ്ങാത്തം സിനിമ ലോകത്തുള്ളവരെ അത്ഭുതപ്പെടുത്തിയിരുന്നു.

നിലമ്പൂര്‍ ബാലൻ സംവിധായകനായ ‘അന്യരുടെ ഭൂമി’ (1979) എന്ന ബ്ലാക്ക് ആന്‍ഡ് വൈറ്റ് ചിത്രത്തിലൂടെയായിരുന്നു അരങ്ങേറ്റം നടത്തിയ മാമുക്കോയയ്ക്ക് പിന്നീട് തിരിഞ്ഞുനോക്കേണ്ടിവന്നിട്ടില്ല. അഭിനയിച്ച സിനിമകളിലെല്ലാം ശ്രദ്ധേയമായ പ്രകടനം കൊണ്ട് അദ്ദേഹം അതിശയിപ്പിച്ചുകൊണ്ടെയിരുന്നു. 

അവസാനമായി പുറത്തിറങ്ങിയ സിനിമകളില്‍ പൃഥ്വിരാജിനൊപ്പം അഭിനയിച്ച കുരുതിയിലെ മൂസ എന്ന കഥാപാത്രം അത്രയധികം ശ്രദ്ധിക്കപ്പെട്ടിരുന്നു.

സത്യന്‍ അന്തിക്കാട്, പ്രിയദര്‍ശന്‍ എന്നിവരുടെ സിനിമകളിലെ സ്ഥിരം സാന്നിധ്യമായിരുന്ന മാമുക്കോയ എല്ലാ തലമുറയിലെയും താരങ്ങള്‍ക്കൊപ്പം അഭിനയിച്ചിട്ടുണ്ടെങ്കിലും ഒരു ആഗ്രഹം ബാക്കിവെച്ചാണ് മാമുക്കോയ വിടവാങ്ങുന്നത്. ഫഹദ് ഫാസിലിനൊപ്പം ഒരു വേഷം ചെയ്യണം അതായിരുന്നു അദ്ദേഹത്തിന്‍റെ ആഗ്രഹം.

മമ്മൂട്ടിയും മോഹന്‍ലാലും സുരേഷ് ഗോപിയും ജയറാമും അടക്കമുള്ള മുതിര്‍ന്ന താരങ്ങള്‍ക്കൊപ്പം അഭിനയിക്കുമ്പോഴുള്ള അതേ ഊര്‍ജം തന്നെയാണ് പൃഥ്വിരാജിനൊപ്പം അഭിനയിച്ചപ്പോഴും മാമുക്കോയ പ്രകടിപ്പിച്ചത്. അപ്പോഴും ഫഹദിനൊപ്പം അഭിനയിക്കണം എന്നത് തന്‍റെ വലിയ ആഗ്രഹം ആണെന്ന് മാമുക്കോയ ഒരു അഭിമുഖത്തില്‍ പറഞ്ഞിരുന്നു

എന്നാല്‍ അങ്ങനെ ഒരു കഥാപാത്രം അദ്ദേഹത്തെ തേടിവന്നില്ല എന്നത് മാമുക്കോയയുടെ നഷ്ടം മാത്രമല്ല, ഫഹദ് ഫാസിലിന്‍റെയും മലയാള സിനിമയുടെയും കൂടി നഷ്ടമാണ്.