തിരുവനന്തപുരം വിമാനത്താവളത്തിൽ വീണ്ടും സ്വർണവേട്ട; ഒന്നേകാൽ കിലോ സ്വർണവുമായി മലപ്പുറം സ്വദേശി പിടിയിൽ

തിരുവനന്തപുരം വിമാനത്തവളത്തിൽ വീണ്ടും സ്വർണക്കടത്തിന് ശ്രമം. ഒന്നേകാൽ കിലോ സ്വ‌ർണം കടത്താൻ ശ്രമിച്ച മലപ്പുറം സ്വദേശി മുഹമ്മദ് അനസിനെ ഡി ആർ ഐ സംഘം പിടികൂടി.

ഇന്നലെ രാത്രിയാണ് അനസ് സ്വർണം കടത്താൻ ശ്രമിച്ചത്. സ്വർണക്കടത്തിന് എയർലൈൻ ജീവനക്കാരുടെ പങ്കുള്ളതായി ഡി ആർ ഐയ്ക്ക് വിവരം ലഭിച്ചു.

ശനിയാഴ്ച ഒരു കോടി രൂപ വിലമതിക്കുന്ന മൂന്നു കിലോ സ്വർണം ഡി ആർ ഐ സംഘം പിടിച്ചെടുത്തിരുന്നു. തമിഴ്നാട് സ്വദേശികളായ ആറുപേരെ ഡി ആർ ഐ സംഘം അന്ന് കസ്റ്റഡിയിലെടുത്തു. ഷാഹുൽ ഹമീദ്, ഷാരൂഖ് ഖാൻ, ജിന്ന, ബാസിർ, അൻസാരി, യാക്കൂബ് അലി എന്നിവരാണ് പിടിയിലായത്. 

മലദ്വാരത്തിൽ കുഴമ്പ് രൂപത്തിലാണ് ഇവർ സ്വർണം ഒളിപ്പിച്ചിരുന്നത്. വെള്ളിയാഴ്ച രാത്രി മാലിദ്വീപിൽ നിന്ന് തിരുവനന്തപുരത്തേയ്ക്കുള്ള എയർ ഇന്ത്യാ വിമാനത്തിലാണ് ഇവരെത്തിയത്.