INFO | ഗൾഫ് മലയാളികളുടെ മൃതദേഹം സൗജന്യമായി നാട്ടിലെത്തിക്കും; എയർ ഇന്ത്യയുമായി കരാർ ഒപ്പിട്ടു

ഗൾഫ് രാജ്യങ്ങളിൽ മരണമടയുന്ന പ്രവാസി മലയാളികളുടെ മൃതദേഹം സൗജന്യമായി നാട്ടിലെത്തിക്കും. ഇതിനായി എയർ ഇന്ത്യയുമായി നോർക്ക റൂട്ട്സ് കരാർ ഒപ്പിട്ടു. തൊഴില്‍ ഉടമയുടെയോ സ്‌പോണ്‍സറുടെയോ എംബസ്സിയുടെയോ സഹായം ലഭിക്കാതെ വരുന്ന സാഹചര്യത്തിൽ മൃതദേഹം സൗജന്യമായി നാട്ടിലെത്തിക്കുന്നതിനാണ് നോര്‍ക്ക അസിസ്റ്റന്റ് ബോഡി റിപ്പാട്രിയേഷൻ എന്ന പദ്ധതി നടപ്പാക്കുന്നത്.

പദ്ധതി നടത്തിപ്പുമായി ബന്ധപ്പെട്ട് നോര്‍ക്ക റൂട്ട്‌സ് ചീഫ് എക്‌സിക്യൂട്ടീവ് ഓഫീസറും എയര്‍ ഇന്ത്യ എക്‌സിക്യൂട്ടീവ് ഡയറക്ടർ കാര്‍ഗോയുമായി ധാരണാപത്രം ഒപ്പു വച്ചത്.

വിദേശ രാജ്യങ്ങളില്‍ മരണപ്പെടുകയും ഭൗതിക ശരീരം നാട്ടിലെത്തിക്കാന്‍ മറ്റ് സഹായം ലഭ്യമാകാതെ വരുകയും ചെയ്യുന്നവർക്ക് ആശ്വാസ മേകുകയെന്ന് ലക്ഷ്യത്തോടെയാണ് പദ്ധതി നടപ്പിലാക്കുന്നത്.

വിമാനത്താവളങ്ങളില്‍ എത്തിക്കുന്ന മൃതദേഹം നോര്‍ക്ക റൂട്ട്‌സിന്റെ നിലവിലുള്ള എമര്‍ജന്‍സി ആംബുലന്‍സ് സര്‍വീസ് മുഖേന വീട്ടിൽ സൗജന്യമായി എത്തിക്കും.

ഇതിനായി പ്രവാസി മലയാളികളുടെ ബന്ധുക്കൾക്കോ സുഹൃത്തുക്കള്‍ക്കോ അപേക്ഷ സമര്‍പ്പിക്കാം. അപേക്ഷ ഫാറവും വിശദവിവരങ്ങളും നോര്‍ക്ക റൂട്ട്‌സ് വെബ് സൈറ്റായ  www.norkaroots.org -ല്‍ ലഭിക്കുമെന്ന് നോര്‍ക്ക റൂട്ട്‌സ് ചീഫ് എക്‌സിക്യൂട്ടീവ് ഓഫീസര്‍ അറിയിച്ചു.

കൂടുതല്‍ വിവരങ്ങള്‍ നോര്‍ക്ക റൂട്ട്‌സ് ടോള്‍ ഫ്രീ നമ്പരായ 1800 425 3939,(ഇന്ത്യയില്‍ നിന്നും) 00918802012345 (വിദേശത്ത് നിന്നും മിസ്ഡ് കാള്‍ സേവനം) നിന്നും ലഭിക്കും.