പന്ത്രണ്ടുകാരനെ ടാക്സി ഡ്രൈവർ ലൈംഗികമായി ഉപദ്രവിച്ചു; സംഭവം അമ്മ പിൻസീറ്റിലിരിക്കെ

ദുബായ്: പന്ത്രണ്ടുകാരനെ ടാക്സി ഡ്രൈവർ ലൈംഗികമായി ഉപദ്രവിച്ചതായി പരാതി. ദുബായിൽ സെപ്തംബർ 16നാണ് സംഭവം. അമ്മ പിൻ സീറ്റിൽ ഇരിക്കുമ്പോഴാണ് കുട്ടി അതിക്രമത്തിന് ഇരയായത്.

ഡ്രൈവർക്കൊപ്പം മുന്‍സീറ്റിൽ ഇരിക്കുകയായിരുന്നു കുട്ടി. യാത്രയിലുടനീളം ടാക്സി ഡ്രൈവർ കുട്ടിയെ മോശമായി തൊട്ടതായാണ് പരാതി. സംഭവവുമായി ബന്ധപ്പെട്ട് പാകിസ്ഥാൻ സ്വദേശിയായ ഡ്രൈവറെ കോടതി വിചാരണ ചെയ്തു

വീട്ടിലെത്തിയ ശേഷം കുട്ടി സംഭവത്തെ കുറിച്ച് അമ്മയെ അറിയിക്കുകയായിരുന്നു. തുടർന്ന് അൽ ബർഷ പൊലീസ് സ്റ്റേഷനിൽ പരാതി നൽകുകയായിരുന്നു.

മുന്നിലെ പാസഞ്ചർ സീറ്റിൽ ഇരിക്കുകയായിരുന്ന തന്റെ തുടയിൽ ഡ്രൈവർ തൊട്ടുവെന്നും തടയാൻ ശ്രമിച്ചപ്പോൾ ആവർത്തിക്കുകയായിരുന്നുവെന്നും കുട്ടി അന്വേഷണ ഉദ്യോഗസ്ഥരോട് പറഞ്ഞു.

മറ്റ് രണ്ട് മക്കൾക്കൊപ്പം പിന്നിലിരിക്കുകയായിരുന്ന താൻ ഡ്രൈവറുടെ കൈ മകന്റെ സീറ്റിൽ കണ്ടതായി കുട്ടിയുടെ അമ്മയും മൊഴി നൽകി.

പൊലീസ് ചോദ്യം ചെയ്യലിനിടെ, കുട്ടിയെ തൊട്ടതായി പ്രതി സമ്മതിച്ചു . എന്നാൽ ഇയാൾ കോടതിയിൽ കുറ്റം നിഷേധിച്ചു. നിലവിൽ ഇയാൾ ജയിലിലാണ്. ഡിസംബർ 12ന് വീണ്ടും വിചാരണ ചെയ്യും.