കണ്ണൂരു നിന്നും ദുബായിലേക്ക് നേരിട്ട് പറക്കാം; ആദ്യ വിമാനം ജൂലൈ 25ന്

കണ്ണൂർ: ദുബായിലേക്ക് കണ്ണൂരിൽനിന്ന് നേരിട്ടു വിമാന സർവീസ് ആരംഭിക്കുന്നു. ഈ മാസം 25 മുതലാണ് കണ്ണൂർ-ദുബായ് വിമാന സർവ്വീസ് ഗോഎയർ ആരംഭിക്കുന്നത്. ബുക്കിങ് ആരംഭിച്ചതായി കമ്പനി ഔദ്യോഗികമായി അറിയിച്ചു. ഇതോടെ കണ്ണൂർ, കാസർകോട്, കോഴിക്കോട് ജില്ലക്കാർക്ക് ഏറെ പ്രയോജനകരമായ സർവീസായി ഇത് മാറും.

നേരത്തെ മംഗളൂരു, കരിപ്പൂർ വിമാനത്താവളങ്ങളെ ആശ്രയിച്ചിരുന്ന യാത്രക്കാർക്കാണ് പുതിയ വിമാനസർവീസ് ഉപകാരപ്പെടുന്നത്. മുമ്പ് വിമാനത്തിൽ സഞ്ചരിക്കുന്നതിനേക്കാൾ കൂടുതൽ സമയം എയർപോർട്ടിലേക്ക് എടുക്കുമായിരുന്നു. കണ്ണൂരിൽനിന്ന് സർവീസ് ആരംഭിക്കുന്നതോടെ വിമാനത്താവളത്തിലും തിരിച്ച് വീട്ടിലും എത്തുന്ന സമയം ഗണ്യമായി കുറയും.

ജൂലൈ 25ന് ഉദ്ഘാടന സർവീസ് വൈകിട്ട് ഏഴരയ്ക്ക് പുറപ്പെട്ട് രാത്രി 10.20ന് ദുബായിൽ എത്തും. തിരിച്ച് അർധരാത്രി 12.20ന് പുറപ്പെടുന്ന വിമാനം രാവിലെ 5.55ന് കണ്ണൂരിലെത്തും.

അടുത്ത മാസത്തോടെ കുവൈത്തിലേക്കും കണ്ണൂരിൽനിന്ന് ഗോഎയർ സർവീസ് ആരംഭിക്കുന്നുണ്ട്. കണ്ണൂർ-ദുബായ്, കണ്ണൂർ-കുവൈത്ത് സർവ്വീസുകളിലായി ഒരു ആഴ്ച 1604 സീറ്റ് യാത്രക്കാർക്ക് ലഭിക്കുമെന്ന് ഗോഎയർ വക്താവ് പറഞ്ഞു.