'എല്ലാം ഒരു സിനിമ പോലെ തോന്നി'; ശ്രീലങ്കൻ ഭീകരാക്രമണത്തിൽ നിന്ന് തലനാരിഴയ്ക്ക് രക്ഷപ്പെട്ട ദമ്പതികൾ പറയുന്നു

ദുബായ്: ഈസ്റ്റർ ദിനത്തിൽ ശ്രീലങ്കയിലുണ്ടായ ഭീകരാക്രമണത്തിൽ നിന്ന് തലനാരിഴയ്ക്ക് രക്ഷപ്പെട്ടത് വിശ്വസിക്കാൻ കഴിയാത്ത അവസ്ഥയിലാണ് ദുബായിൽ സ്ഥിരതാമസക്കാരായ ഇന്ത്യൻ ദമ്പതികള്‍.

കൊളംബോയിലെ സിനമൺ ഗ്രാൻഡ് ഹോട്ടലിലെ സ്ഫോടനത്തിൽ നിന്നാണ് ഇവർ രക്ഷപ്പെട്ടത്. അഭിനവ് ചാരി, ഭാര്യ നവ് രൂപ് കെ ചാരി എന്നിവർ അപകടത്തെ കുറിച്ച് പറയുന്നത് 'എല്ലാം സിനിമ പോലെ തോന്നി' എന്നാണ്. ഗൾഫ് ന്യൂസിനോടാണ് ഇവർ ഇക്കാര്യം പറഞ്ഞത്.

ബിസിനസ് ട്രിപ്പിന്റെ ഭാഗമായിട്ടായിരുന്നു ഇവർ ശ്രീലങ്കയിൽ എത്തിയത്. സിനമൺ ഗ്രാൻഡിലായിരുന്നു താമസം. ബ്രേക്ക് ഫാസ്റ്റ് ബുഫെ നടക്കുന്നതിനിടെയായിരുന്നു ഇവിടെ സ്ഫോടനം ഉണ്ടായതെന്നാണ് റിപ്പോർട്ടുകൾ.

അഭിനവും ഭാര്യയും ദുബായിലാണ് വളർന്നത്. രണ്ട് പ്രാവശ്യം മാത്രമാണ് യുഎഇയിൽ നിന്ന് പുറത്തേക്ക് പോയിട്ടുള്ളത്. ആ രണ്ട് തവണയും ഭീകരമായ സംഭവങ്ങൾക്കാണ് സാക്ഷിയാകേണ്ടി വന്നത്. അവ രണ്ടും മതപരമായ ഭീകരാക്രമണമായിരുന്നു- അഭിനവ് പറയുന്നു.

ആദ്യത്തേത്ത് 2008ലെ മുംബൈ ഭീകരാക്രമണം ആയിരുന്നു. അന്ന് മെഡിസിൻ പഠനത്തിനായി മുംബൈയിൽ വന്നതായിരുന്നു ഞാൻ. അഞ്ചോ ആറോ ദിവസം നീണ്ടു നിന്ന അപകടം ആയിരുന്നു അത്- അഭിനവ് വ്യക്തമാക്കുന്നു.

ഇസ്റ്റർ ദിനത്തിൽ ഞങ്ങൾ പള്ളിയിൽ പോയിരുന്നു. പ്രാർഥനയ്ക്കിടെ പള്ളിയിൽ നിന്ന് പോകാൻ പുരോഹിതൻ എല്ലാവരോടും ആവശ്യപ്പെട്ടു. പള്ളിയിൽ നിന്നിറങ്ങി ടാക്സിയിൽ കയറി ബ്രേക്ക് ഫാസ്റ്റ് കഴിക്കാൻ പോയതായിരുന്നു ഞങ്ങൾ. റോഡിൽ എന്തൊക്കെയോ അസ്വസ്ഥതകൾ ഉണ്ടെന്ന് മനസിലായതോടെ തിരികെ ഹോട്ടലിലേക്ക് പോയി.- ശ്രീലങ്കൻ അനുഭവത്തെ കുറിച്ച് അഭിനവ് വിവരിച്ചു.

ഹോട്ടലിലെത്തിയപ്പോൾ എല്ലാവരും പുറത്ത് ഇറങ്ങി നിൽക്കുന്നതാണ് കണ്ടത്. സുരക്ഷാ പ്രശ്നങ്ങളെ തുടർന്നാണിതെന്നാണ് ആദ്യം കരുതിയത്- അഭിനവ് പറഞ്ഞു. ഒന്നും വിശ്വസിക്കാൻ കഴിഞ്ഞില്ല. എല്ലാം സിനിമ പോലെയാണ് തോന്നിയത്- നവ് രൂപ് പറഞ്ഞു.