ഡ്രോൺ ഭീതി: അബുദാബിയിൽ ആറ് വിമാനങ്ങൾ വഴിതിരിച്ചുവിട്ടു

ദുബായ്: സംശയാസ്പദമായ രീതിയിൽ ഡ്രോൺ കണ്ടെത്തിയതിനെ തുടർന്ന് അബുദബിയിൽ ആറ് വിമാനങ്ങൾ കഴിഞ്ഞ ദിവസം വഴിതിരിച്ചുവിട്ടു. അബുദബി അന്താരാഷ്ട്ര വിമാനത്താവളത്തിൽ ഇറങ്ങേണ്ടിയിരുന്ന ആറ് എയർ അറേബ്യ വിമാനങ്ങൾ റാസ് അൽ ഖൈമ വിമാനത്താവളത്തിലേക്കാണ് വഴി തിരിച്ചുവിട്ടത്. വ്യാഴാഴ്ച രാവിലെ 7:00 നും 9:00 നും ഇടയിൽ ലാൻഡ് ചെയ്യേണ്ടിയിരുന്ന ആറ് വിമാനങ്ങളാണ് വഴിതിരിച്ചുവിട്ടതെന്ന് ഷാർജ എയർപോർട്ട് അധികൃതർ അറിയിച്ചു. അതേസമയം ഡ്രോൺ കണ്ടതിനെ തുടർന്നാണ് വിമാനങ്ങൾ വഴിതിരിച്ചുവിട്ടതെന്ന് ഔദ്യോഗികമായി അറിയിച്ചിട്ടില്ല.

റാസ് അൽ ഖൈമയിലേക്ക് തിരിച്ചുവിട്ട ഒരു വിമാനത്തിലെ യാത്രക്കാരനാണ് ഡ്രോൺ ഭീതിയാണ് കാരണമെന്ന് ട്വീറ്റ് ചെയ്തത്. പിന്നീട് അബുദബി വിമാനത്താവളത്തിലെ ചില ജീവനക്കാരും ഇക്കാര്യം അനൌദ്യോഗികമായി സ്ഥിരീകരിക്കുകയായിരുന്നു.

സംഭവത്തെക്കുറിച്ച് പ്രതികരിക്കാൻ എയർ അറേബ്യ അധികൃതർ തയ്യാറായില്ല. എന്തുകൊണ്ടാണ് വിമാനം വഴിതിരിച്ചുവിട്ടതെന്ന് അവർ വിശദീകരിച്ചിട്ടില്ല. യുഎഇയിൽ വിമാനത്താവളത്തിന്‍റെ അഞ്ചു കിലോമീറ്റർ ചുറ്റളവിൽ ഡ്രോൺ പറത്തുന്നത് കുറ്റകരമാണ്. 20,000 ദിർഹം വരെ പിഴയും ജയിൽ ശിക്ഷയും ലഭിക്കാവുന്ന കുറ്റവുമാണിത്.