യുഎഇയിൽ ടൂറിസ്റ്റ് വിസ ഇനി അഞ്ചുവർഷത്തേക്ക്

അബുദാബി: വൻ വിനോദസഞ്ചാര വികസനം ലക്ഷ്യമിട്ട് അഞ്ചു വർഷത്തേക്ക് ടൂറിസ്റ്റ് വിസ അനുവദിക്കാൻ യുഎഇ തീരുമാനിച്ചു. അഞ്ചു വർഷത്തേക്കുള്ള മൾട്ടിപ്പിൾ എൻട്രി ടൂറിസ്റ്റ് വിസയ്ക്കാണ് യുഎഇ മന്ത്രിസഭ അംഗീകാരം നൽകിയത്. ഏതു രാജ്യത്തുനിന്നുമുള്ള പൌരൻമാർക്ക് ഈ വിസ ലഭിക്കുമെന്നതാണ് പ്രധാന സവിശേഷത.

യുഎഇയെ ലോകത്തെ ഒന്നാം നമ്പർ വിനോദ സഞ്ചാര കേന്ദ്രമാക്കുകയെന്ന ലക്ഷ്യത്തോടെയാണ് പുതിയ നിയമം കൊണ്ടുവരുന്നത്. യുഎഇ വൈസ് പ്രസിഡന്‍റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമാണ് പുതിയ ടൂറിസ്റ്റ് വിസയുടെ കാര്യം ട്വിറ്ററിലൂടെ അറിയിച്ചത്.

കഴിഞ്ഞ ഒരു വർഷത്തെ പ്രവർത്തനങ്ങൾ വിശകലനം ചെയ്തുകൊണ്ടുതന്നെ 2020നെ വ്യത്യസ്തമായ രീതിയിൽ സ്വീകരിക്കാനാണ് യുഎഇ തീരുമാനിച്ചിരിക്കുന്നതെന്ന് ട്വീറ്റിൽ പറയുന്നു. അടുത്ത അമ്പത് വർഷത്തേക്കുള്ള യുഎഇയുടെ ഭാവി രൂപപ്പെടുത്തുന്നതിൽ ഏറെ നിർണായകമായ വർഷമായിരിക്കും 2020 എന്നും അദ്ദേഹം വ്യക്തമാക്കി.