വിമാനക്കൂലിയല്ല തെരഞ്ഞെടുപ്പ് വിജയമാണ് പ്രധാനം; ചൊവ്വാഴ്ച കോഴിക്കോടെത്തുന്നത് KMCC പ്രവര്‍ത്തകര്‍ ഉള്‍പ്പെടെ 500 പേര്‍

ദുബായ്: വിമാനക്കൂലി കുത്തനെ ഉയര്‍ന്നിട്ടും തെരഞ്ഞെടുപ്പ് പ്രചാരണത്തിനും വോട്ടു ചെയ്യാനുമായി പ്രവാസി മലയാളികള്‍ കൂട്ടത്തോടെ നാട്ടിലേക്കെത്തുന്നു. നിലവില്‍ 900 ദിര്‍ഹം(17,100 രൂപ) ആണ് നാട്ടിലേക്കും തിരിച്ചുമുള്ള യാത്രയ്ക്ക് വിമാന കമ്പനികള്‍ ഈടാക്കുന്നത്.

ഇതുവരെ അയ്യായിരത്തിലധികം പേര്‍ തെരഞ്ഞെടുപ്പ് പ്രവര്‍ത്തനങ്ങള്‍ക്കും വോട്ട് ചെയ്യാനുമായി അടുത്തിടെ നാട്ടിലെത്തിയിട്ടുണ്ടെന്ന് കെ.എം.സി വ്യക്തമാക്കുന്നു. ചൊവ്വാഴ്ച മുതല്‍ കൂടുതല്‍ പേര്‍ നാട്ടിലെത്തും. ഏപ്രില്‍ 22-ന് ടിക്കറ്റ് ബുക്ക് ചെയ്ത് കാത്തിരിക്കുന്നവരും നിരവധിയുണ്ട്. 23-നാണ് കേരളത്തില്‍ വോട്ടെടുപ്പ് നടക്കുന്നത്.

ചൊവ്വാഴ്ച കെ.എം.സി.സി അംഗങ്ങള്‍ ഉള്‍പ്പെടെ 500 പേരാണ് തെരഞ്ഞെടുപ്പ് പ്രവര്‍ത്തനത്തിനായി എയര്‍ ഇന്ത്യ വിമാനത്തില്‍ കോഴിക്കോട്ടെത്തുന്നത്. കേരളത്തില്‍ മാത്രമല്ല യു.എ.ഇയിലെ പ്രവാസി മലയാളികളും തെരഞ്ഞെടുപ്പ് ആവേശത്തിലാണ്.

വയനാട്ടില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി മത്സരിക്കുന്നതും അഭിപ്രായ സര്‍വെകളില്‍ യു.ഡി.എഫിന് ഉജ്വലവിജയം പ്രവചിച്ചതുമാണ് പ്രവാസികളെ നാട്ടിലെത്താന്‍ പ്രേരിപ്പിക്കുന്നതെന്നാണ് കെ.എം.സി.സി നേതാക്കള്‍ പറയുന്നത്.

തെരഞ്ഞെടുപ്പ് പ്രവര്‍ത്തനത്തിനായി നാട്ടിലേക്ക് പോകുന്നവരുടെ യാത്രയുമായി ബന്ധപ്പെട്ട നടപടിക്രമങ്ങള്‍ വേഗത്തിലാക്കാന്‍ കെ.എം.സി.സി ദുബായില്‍ ഹെല്‍പ് സെന്ററും ആരംഭിച്ചിട്ടുണ്ട്.