ഇന്ത്യൻ പാസ്പോർട്ട് ഉള്ളവർക്ക് അറൈവൽ വിസയുമായി യുഎഇ

ദുബായ്: യുകെയിലോ മറ്റ് യൂറോപ്യൻ രാജ്യങ്ങളിലോ റെസിഡൻസി വിസയുള്ള ഇന്ത്യക്കാർക്ക് അറൈവൽ വിസ നൽകുമെന്ന് യുഎഇ. എമിറേറ്റ്സ് സന്ദർശിക്കാനെത്തുന്ന ഇന്ത്യക്കാരുടെ ബന്ധുക്കൾക്കോ സുഹൃത്തുക്കൾക്കോ ആണ് ഈ സൌകര്യം ലഭ്യമാക്കുകയെന്ന് ദുബായിലെ ഡയറക്ടർ ജനറൽ ഓഫ് റെസിഡൻസ് ആൻഡ് ഫോറിനേഴ്സ് അഫയേഴ്സ് വ്യക്തമാക്കി.

ഇതനുസരിച്ച് യുഎഇയിലുള്ള ഇന്ത്യക്കാർക്ക് അവരുടെ സുഹൃത്തോ ബന്ധുവോ ആയിട്ടുള്ള യു.കെ റെസിഡൻസി വിസയുള്ളവരെ യുഎഇയിലേക്ക് കൊണ്ടുവരാം.

ഇതിനായി മർഹബ സർവീസ് കൌണ്ടറിൽ സർവീസ് ചാർജ് ഉൾപ്പടെ 120 ദിർഹം അടച്ച് അപേക്ഷിച്ചാൽ എൻട്രി പെർമിറ്റ് നേടാനാകും. 14 ദിവസത്തേക്കാണ് ഇത്തരത്തിൽ സന്ദർശനനുമതി ലഭിക്കുന്നത്. അധികമായി 250 ദിർഹം അടച്ച് സന്ദർശന കാലാവധി നീട്ടാം. 28 ദിവസമാണ് ഇത്തരത്തിൽ അധികമായി താമസിക്കാൻ സാധിക്കുന്നത്.