ഭർത്താവിന് വീട്ടുജോലിക്കാരിയുമായി അവിഹിതം; വിവാഹമോചനം തേടി ഭാര്യ കോടതിയിൽ

ദുബായ്: ഭർത്താവിന് വീട്ടുജോലിക്കാരിയുമായി അവിഹിത ബന്ധമുണ്ടെന്ന് അറിഞ്ഞതോടെ വിവാഹമോചനം തേടി ഭാര്യ കോടതിയെ സമീപിച്ചു. ബഹറിനിലാണ് സംഭവം.

ഭർത്താവിന് വീട്ടുജോലിക്കാരിയുമായി ബന്ധമുണ്ടെന്നും, തന്നെ ഒപ്പം താമസിപ്പിക്കുന്നില്ലെന്നും ചൂണ്ടിക്കാട്ടിയാണ് യുവതി വിവാഹമോചന ഹർജി ഫയൽ ചെയ്തത്.

വീട്ടുജോലിക്കാരിയെ കൂടാതെ മറ്റ് നിരവധി സ്ത്രീകളുമായി തന്‍റെ ഭർത്താവ് അടുപ്പം പുലർത്തുന്നുണ്ടെന്നും യുവതി പരാതിയിൽ പറയുന്നു. കൂടാതെ തന്നെ ഒപ്പം താമസിപ്പിക്കാനും ഭർത്താവ് തയ്യാറാകുന്നില്ല. അഞ്ച് കുട്ടികളുടെ അമ്മ കൂടിയാണ് പരാതിക്കാരി.

ഭർത്താവ് വീട്ടുജോലിക്കാരിയുമായി ലൈംഗിക ബന്ധത്തിൽ ഏർപ്പെട്ടത് താൻ കാണാനിടയായെന്ന് യുവതി പറയുന്നു. ഇതോടെയാണ് വിവാഹമോചനം ആവശ്യപ്പെട്ടുള്ള പരാതിയുമായി യുവതി കോടതിയെ സമീപിച്ചത്. എന്നാൽ യുവതിയുടെ ആവശ്യം കീഴ് കോടതി നിരസിച്ചു. ഇതോടെ യുവതി അപ്പീൽ കോടതിയെ സമീപിക്കുകയായിരുന്നു.

“ഭർത്താവിൽനിന്ന് ബന്ധം വേർപെടുത്തണമെന്നുള്ള എന്റെ കക്ഷിയുടെ ആഗ്രഹം എല്ലാവർക്കും അറിയാവുന്ന കാര്യമാണ്, അവൾ ഒരു പടി പോലും പിന്നോട്ടില്ല,” പ്രതിയുടെ അഭിഭാഷകൻ കൂടിയായ എബ്റ്റിസം അൽ സബാഗ് പറഞ്ഞു. “അപ്പീൽ കോടതിയിൽ നിന്ന് വ്യത്യസ്തമായ ഒരു ഫലം ഞങ്ങൾ പ്രതീക്ഷിക്കുന്നു.”- അദ്ദേഹം പറഞ്ഞു.