65കാരി 18 മാസത്തിനിടെ ജന്മം നൽകിയത് 8 കുഞ്ഞുങ്ങൾക്ക്; സർക്കാർ രേഖകൾ കണ്ട് ഞെട്ടി ലീലാ ദേവി

പാറ്റ്ന: ബിഹാറിലെ മുസഫർപൂർ ഛോട്ടികൊത്തിയ ഗ്രാമത്തിലെ 65കാരി 18 മാസത്തിനുള്ളിൽ ജന്മനൽകിയത് എട്ട് കുഞ്ഞുങ്ങൾക്ക്. സർക്കാർ രേഖകളിലാണ് അപൂർവമായ ഈ വിവരങ്ങൾ.

ലീലാ ദേവിയെന്ന സ്ത്രീയാണ് 18 മാസത്തിനിടെ എട്ട് കുഞ്ഞുങ്ങളുടെ അമ്മയായതെന്ന് ദേശീയ ആരോഗ്യ മിഷന്റെ രേഖകളിൽ വ്യക്തമാക്കിയിട്ടുള്ളത്. ഇവർക്ക് 21 വർഷങ്ങൾക്ക് മുമ്പാണ് ഒരു കുഞ്ഞ് ജനിച്ചതെന്നതാണ് യാഥാർഥ്യം.

ദേശീയ ആരോഗ്യ മിഷന്റെ കീഴിലുള്ള ദേശീയമാതൃഗുണഭോക്തൃ പദ്ധതിയുടെ ആനുകൂല്യങ്ങൾ ലഭിക്കാൻ തുടങ്ങിയതോടെയാണ് ലീല ദേവിയും ഇക്കാര്യം അറിയുന്നത്. പ്രതിമാസം 1400 രൂപയാണ് പദ്ധതി പ്രകാരം ലീലാ ദേവിക്ക് ലഭിച്ചത്.

കഴിഞ്ഞയാഴ്ച ആദ്യമായി തുക ലഭിച്ചതോടെയാണ് ലീലാദേവി അധുകൃതരോട് കാര്യം തിരക്കിയത്. അക്കൗണ്ട് ഉള്ള ഇടത്തെ കസ്റ്റമർ സർവീസ് ഓപ്പറേറ്ററോടാണ് കാര്യം തിരക്കിയത്.

അപ്പോഴാണ് തട്ടിപ്പ് തിരിച്ചറിഞ്ഞത്. കേസ് ഫയൽ ചെയ്യരുതെന്നും തന്റെ പേരിൽ പിൻവലിച്ച പണം അവർ മടക്കിനൽകുമെന്നും ഓപ്പറേറ്റർ പറഞ്ഞതായി ലീല ദേവി പറഞ്ഞു.

ഇത്തരത്തിൽ പ്രയോജനം നേടിയ ഏക വൃദ്ധയായ സ്ത്രീ ലീല ദേവി മാത്രമല്ല. ജില്ലയിലെ 50 ലധികം സ്ത്രീകളുടെ അക്കൗണ്ടുകളിൽ പണം നിക്ഷേപിക്കുകയും പിൻവലിക്കുകയും ചെയ്തിട്ടുളളതായി കണ്ടെത്തി.

66കാരിയായ ശാന്തി ദേവി എന്ന സ്ത്രീ ഒരു ദിവസം പത്ത് മണിക്കൂർ വ്യത്യാസത്തിൽ രണ്ട് കുഞ്ഞുങ്ങൾക്ക് ജന്മം നൽകിയെന്ന വിചിത്ര രേഖയും ഉണ്ട്.

സ്റ്റേറ്റ് ബാങ്ക് ഓഫ് ഇന്ത്യയുമായി ബന്ധപ്പെട്ട് പ്രവർത്തിക്കുന്ന കസ്റ്റമർ സർവീസ് പോയിന്റിലെ ജീവനക്കാരൻ സുശീൽ കുമാറാണ് തട്ടിപ്പിന് പിന്നിലെന്നാണ് സൂചന.

ആധാറുമായി ബന്ധിപ്പിച്ച അക്കൗണ്ടില്‍ നിന്നും പണം പിന്‍വലിക്കുന്നതിന് വിരലടയാളം വേണം. സുശീല്‍ കുമാര്‍ എങ്ങനെയാണ് വിരലടയാളമുപയോഗിച്ച്‌ അക്കൗണ്ടില്‍ നിന്നും പണം പിന്‍വലിച്ചതെന്ന് വ്യക്തമല്ല. സുശീല്‍ കുമാര്‍ ഒളിവിലാണ്. പണം തട്ടുന്നതിന് അധികൃതര്‍ നടത്തിയ തിരിമറിയാണോ എന്നും സംശയമുണ്ട്.