രാജീവ് ഗാന്ധിക്കെതിരെ വീണ്ടും മോദി; ഐഎൻഎസ് വിരാട് സ്വകാര്യ ആവശ്യങ്ങൾക്ക് ഉപയോഗിച്ചു

രാജീവ് ഗാന്ധിക്കെതിരെ വീണ്ടും ശക്തമായ ആരോപണങ്ങളുമായി പ്രധാനമന്ത്രി നരേന്ദ്രമോദി.

ദില്ലിയിലെ രാംലീല മൈതാനിയില്‍ തിരഞ്ഞെടുപ്പ് റാലിയില്‍ സംസാരിക്കവെയാണ് മോദി പുതിയ വിവാദത്തിന് തിരികൊളുത്തിയത്.

യുദ്ധക്കപ്പലായ ഐഎന്‍എസ് വിരാട് മുന്‍ പ്രധാനമന്ത്രി രാജീവ് ഗാന്ധിക്ക് പ്രൈവറ്റ് ടാക്‌സി പോലെയാണ് ഉപയോഗിച്ചിരുന്നത് എന്നാണ് മോദിയുടെ പുതിയ ആരോപണം.

രാജീവ് ഗാന്ധിയും കുടുംബവും നാവി ഉദ്യോഗസ്ഥരെ വീട്ടുജോലികള്‍ക്കായി ഉപയോഗിച്ചുവെന്നും അദ്ദേഹം ആരോപിച്ചു.

ഒരു ദ്വീപില്‍ രാജീവും കുടുംബവും അവധിക്കാലം ചിലവഴിക്കുമ്പോളായിരുന്നു ഇതെന്നാണ് മോദിയുടെ ആരോപണം. 10 ദിവസം ഇന്ത്യന്‍ നാവികസേനയുടെ ഐഎന്‍എസ് വിരാട് കപ്പല്‍ ആ ദ്വീപിന് സമീപം പിടിച്ചിട്ടിരുന്നുവെന്നും ഇന്ത്യയുടെ സമുദ്രാതിര്‍ത്തി സംരക്ഷിക്കേണ്ട കപ്പലാണ് ഇത്തരത്തില്‍ രാജീവ് ഗാന്ധി ദുരുപയോഗം ചെയ്തതതെന്നും മോദി ആരോപിച്ചു.

ബന്ധുക്കളെല്ലാം ആ കപ്പലിലുണ്ടായിരുന്നു. ഇത് ദേശസുരക്ഷയെ അപായപ്പെടുത്തലായിരുന്നില്ലേ എന്ന് മോദി ചോദിച്ചു.

ലോക്‌സഭ തിരഞ്ഞെടുപ്പ് പ്രചാരണത്തിനിടെ ഇത് മൂന്നാം തവണയാണ് മോദി രാജീവ് ഗാന്ധിയെ ആക്രമിക്കുന്നത്.

അഴിമതിക്കാരനായ പ്രധാനമന്ത്രിയായിരുന്നു രാജീവ് ഗാന്ധി എന്നായിരുന്നു മോദിയുടെ മുൻപുള്ള ആരോപണം