കൊറോണ വൈറസ് എന്ന് സംശയം; വൈറൽ പനി ബാധിച്ച 50 വയസുകാരൻ ആത്മഹത്യ ചെയ്തു

ഹൈദരാബാദ്: കൊറോണവൈറസ് ഭീതിയുടെ നിഴലിലാണ് ലോകമെങ്ങും. ചൈനയിൽ പൊട്ടി പുറപ്പെട്ട കൊറോണ വൈറസ് ഇതുവരെ ജീവനെടുത്തത് ആയിരത്തിൽ അധികം ആളുകളുടേതാണ്.

ഇതിനിടയിലാണ് ഹൈദരാബാദിൽ നിന്ന് വളരെ സങ്കടകരമായ ഒരു വാർത്ത വന്നിരിക്കുന്നത്. വൈറൽ പനി കൊറോണ വൈറസ് ആണെന്ന് സംശയിച്ച് അമ്പതുകാരൻ തൂങ്ങി മരിച്ചു. ഭാര്യയെയും മക്കളെയും വൈറസ് ബാധയിൽ നിന്ന് സംരക്ഷിക്കുന്നതിനു വേണ്ടി ആയിരുന്നു ഇത്തരത്തിലൊരു നീക്കത്തിലേക്ക് ഇയാൾ എത്തിയത്.

വൈറൽ പനി ബാധിച്ച ബാല കൃഷ്ണഹാദിനോട് ആളുകൾ കൊറോണ വൈറസ് പരിശോധന കൂടി നടത്താൻ ആവശ്യപ്പെടുകയായിരുന്നു. എന്നാൽ, നേരെ അമ്മയുടെ ശവകുടീരത്തിൽ എത്തിയ അദ്ദേഹം അതിന് സമീപത്തുള്ള ഒരു മരത്തിൽ തൂങ്ങി മരിക്കുകയായിരുന്നു. അയൽക്കാർ നടത്തിയ തിരച്ചിലിലാണ് ശവകുടീരത്തിന് സമീപം തൂങ്ങിമരിച്ച നിലയിൽ അദ്ദേഹത്തെ കണ്ടെത്തിയത്.

സംഭവത്തെ തുടർന്ന് പൊലീസ് എത്തുകയും കുടുംബാംഗങ്ങളെ പൊലീസ് ചോദ്യം ചെയ്യുകയും ചെയ്തു. അതേസമയം, ഡോക്ടർ വന്ന് നടത്തിയ പരിശോധനയിൽ കൃഷ്ണഹാദിന് കൊറോണ വൈറസ് ബാധയില്ലെന്നും സാധാരണയുള്ള വൈറൽ പനി മാത്രമാണ് ഉളളതെന്നും കണ്ടെത്തി.

ഹൈദരാബാദിൽ ഇതുവരെയും കൊറോണ വൈറസ് റിപ്പോർട്ട് ചെയ്തിട്ടില്ലെന്നും ഡോക്ടർ വ്യക്തമാക്കി. ആരും ഇത്തരത്തിലുള്ള കടുംകൈ ചെയ്യരുതെന്നും ശരിയായ ചികിത്സ തേടണമെന്നും ഡോക്ടർ നിർദ്ദേശം നൽകി.