പൗരത്വ നിയമ ഭേദഗതിയിൽ നിന്ന് ഒരിഞ്ചുപോലും പിന്നോട്ടില്ല: അമിത് ഷാ

രാജസ്ഥാൻ: പൗരത്വ നിയമ ഭേദഗതിയിൽ നിന്ന് ഒരിഞ്ചുപോലും പിന്നോട്ട് പോകില്ലെന്ന് ആഭ്യന്തര മന്ത്രി അമിത് ഷാ. പൗരത്വനിയമത്തിനെതിരായ  പ്രതിഷേധം തുടരുന്നതിനിടെയാണ് ആഭ്യന്തരമന്ത്രി നിലപാട് ആവർത്തിച്ച് വ്യക്തമാക്കിയത്. ഏതൊക്കെ രാഷ്ട്രീയ പാർട്ടികൾ ഒരുമിച്ച് നിന്ന് എതിർത്താലും ബി.ജെ.പി. പിൻമാറില്ല

നിയമത്തെപ്പറ്റി  വ്യാപകമായി വ്യാജ പ്രചരണം നടക്കുന്നുണ്ട്. വോട്ട് ബാങ്ക് മുന്നിൽ കണ്ടാണ് കോൺഗ്രസ് പ്രതിഷേധിക്കുന്നത്. രാഹുൽ ഗാന്ധി നിയമം മനസിലാക്കായ ശേഷം പ്രതിഷേധിക്കട്ടെയെന്നും അമിത് ഷാ രാജസ്ഥാനിലെ ജോദ്പൂരിൽ പറഞ്ഞു

പൗരത്വ ഭേദഗതിയെ പിന്തുണച്ചുകൊണ്ടുള്ള മിസ്ഡ് കോൾ പ്രചാരണം ബി.ജെ.പി ആരംഭിച്ചു. പ്രതിഷേധങ്ങളെ രാഷ്ട്രീയമായി പ്രതിരോധിക്കാൻ ബി.ജെ.പി. നേരത്തെ തീരുമാനിച്ചിരുന്നു. പ്രചാരണ പരിപാടിക്കായി ഓരോ സംസ്ഥാനത്തും ചുമതലപ്പെടുത്തിയിട്ടുണ്ട്

കേരളം, തമിഴ്നാട്, ആന്ധ്രാപ്രദേശ്, കർണാടക, തെലുങ്കാന എന്നീ ദക്ഷിണേന്ത്യൻ സംസ്ഥാനങ്ങളിൽ മുതിർന്ന നേതാവ് രവീന്ദ്ര രാജുവിനാണ് ചുമതല. ജനുവരി അഞ്ച് മുതല്‍ ജനുവരി 15 വരെ വിവിധ പ്രചാരണ പരിപാടികള്‍ സംഘടിപ്പിക്കാനാണ് ബി.ജെ.പി. തയ്യാറെടുക്കുന്നത്

ദേശവ്യാപകമായി വന്‍ റാലികള്‍, പൗരത്വ ഭേദഗതി നിയമത്തെ  അനുകൂലിക്കുന്ന രാഷ്ട്രീയത്തിന് പുറത്തുള്ള  വ്യക്തികളെ പങ്കെടുപ്പിച്ചുകൊണ്ടുള്ള സെമിനാറുകള്‍, ശില്പശാലകള്‍, ഗൃഹസമ്പര്‍ക്കം, മറ്റ് ബോധവല്‍ക്കരണ പരിപാടികള്‍ എന്നിവ സംഘടിപ്പിക്കുന്നതിന് ബി.ജെ.പി. നേതൃത്വം ആഹ്വാനം ചെയ്തിട്ടുണ്ട്

പൗരത്വ ഭേദഗതി നിയമത്തെ അനുകൂലിച്ചുള്ള പ്രചരണങ്ങളില്‍ ഒരു വിട്ടുവീഴ്ച്ചയും പാടില്ലെന്ന്  അമിത് ഷാ സംസ്ഥാന ഘടകങ്ങള്‍ക്ക് നിർദ്ദേശം നല്‍കിയിരുന്നു