1984ലെ കലാപവും അടിയന്തരാവസ്ഥയും കാണിക്കുന്നത് കോൺഗ്രസിന്റെ ധാര്‍മികത; വിമര്‍ശനവുമായി പ്രഗ്യ സിംഗ് താക്കൂർ

മുംബൈ: ഡൽഹി കലാപങ്ങളുടെ പശ്ചാത്തലത്തിൽ ആഭ്യന്ത്രമന്ത്രി അമിത് ഷായുടെ രാജി ആവശ്യപ്പെട്ട കോൺഗ്രസിനെ 1984ലെ സിഖ് വിരുദ്ധ കലാപത്തെ കുറിച്ചും അടിയന്തരാവസ്ഥക്കാലത്തെ കുറിച്ചും ഓർമപ്പെടുത്തി ബിജെപി എംപി പ്രഗ്യ സിംഗ് താക്കൂർ.

സിഖ് വിരുദ്ധ കലാപത്തിലും 1975-77 ലെ അടിയന്തരാവസ്ഥയിലും കോൺഗ്രസിന്റെ ധാർമികത പ്രകടമായിരുന്നുവെന്ന് പ്രഗ്യ സിംഗ് താക്കൂർ വിമർശിച്ചു. കോൺഗ്രസ് അമിത്ഷായുടെ രാജി ആവശ്യപ്പെട്ടതുമായി ബന്ധപ്പെട്ട ചോദ്യങ്ങളോട് പ്രതികരിക്കുകയായിരുന്നു അവർ.

ഡൽഹിയിൽ കലാപങ്ങൾ ആസൂത്രണം ചെയ്യുന്നത് കോൺഗ്രസ് ആണെന്നും പ്രഗ്യ സിംഗ് താക്കൂർ ആരോപിച്ചു. 2008ലെ മാലേഗാവ് സ്ഫോടനക്കേസുമായി ബന്ധപ്പെട്ട് പ്രത്യേക എൻഐഎ കോടതിയിൽ ഹാജരായ ശേഷം മാധ്യമ പ്രവർത്തകരോട് സംസാരിക്കുകയായിരുന്നു പ്രഗ്യ സിംഗ് താക്കൂർ. മാലേഗാവ് സ്ഫോടനക്കേസിലെ പ്രതികളിലൊരാളാണ് പ്രഗ്യ സിംഗ്.

ഡൽഹി കലാപത്തിൽ 34 പേരാണ് ഇതുവരെ കൊല്ലപ്പെട്ടത്. ആഭ്യന്ത്ര മന്ത്രി അമിത്ഷാ രാജി വയ്ക്കണമെന്ന് കോൺഗ്രസ് അധ്യക്ഷ സോണിയാഗാന്ധി ആവശ്യപ്പെട്ടിരുന്നു. ഇതുമായി ബന്ധപ്പെട്ട ചോദ്യങ്ങളോട് പ്രതികരിക്കുകയായിരുന്നു പ്രഗ്യ സിംഗ്.

എത്രത്തോളം ധാർമികത അവർക്കുണ്ടെന്ന് 1984ലെ കലാപത്തിലും അടിയന്തരാവസ്ഥയിലും പ്രകടമായിരുന്നു- പ്രഗ്യസിംഗ് പറഞ്ഞു. ഈ മുഴുവൻ കാര്യങ്ങളും (അക്രമം) അവർ ആസൂത്രണം ചെയ്തതാണ്, എന്നിട്ട് അവർ രാജി ആവശ്യപ്പെടുന്നു. ധാർമ്മികത അവരിൽ അവശേഷിക്കുന്നില്ല. എന്ത് അടിസ്ഥാനത്തിലാണ് അവർ രാജി ആവശ്യപ്പെട്ടത്? - പ്രഗ്യ സിംഗ് ചോദിച്ചു.

ഡൽഹി കലാപത്തിന് കേന്ദ്രവും ഡൽഹി സർക്കാരും ഉത്തരവാദികളാണെന്ന് സോണിയാ ഗാന്ധി കഴിഞ്ഞ ദിവസം ആരോപിച്ചിരുന്നു. ഇതിനു പിന്നാലെയാണ് അമിത്ഷായുടെ രാജി ആവശ്യപ്പെട്ടത്. കലാപം ആസൂത്രിതമാണെന്നും സോണിയാ ഗാന്ധി കുറ്റപ്പെടുത്തിയിരുന്നു.

ബിജെപി ഒരിക്കലും രാജ്യത്തിനെതിരായി ഒന്നും ചെയ്തിട്ടില്ലെന്നും ഇനി ചെയ്യുകയുമില്ലെന്നും പ്രഗ്യസിംഗ് പറഞ്ഞു. പാർലമെന്റിൽ പാർട്ടി എടുക്കുന്ന തീരുമാനങ്ങൾ രാജ്യതാത്പര്യത്തിനനുസരിച്ചുള്ളതാണെന്നും രാജ്യത്തെ കൂടുതൽ ശക്തമാക്കാനാണ് ഉദ്ദേശിക്കുന്നതാണെന്നും ജനങ്ങൾക്കറിയാമെന്നും അവർ പറഞ്ഞു.