ബംഗാളിലെ തെരഞ്ഞെടുപ്പ് പരാജയം; ഇവിഎം ക്രമക്കേട് ആരോപണവുമായി ബിജെപി

കൊൽക്കത്ത: ബംഗാളിലെ മൂന്ന് നിയമസഭ മണ്ഡലങ്ങളിൽ നടന്ന ഉപതെരഞ്ഞെടുപ്പിൽ വോട്ടിംഗ് മെഷീനിൽ ക്രമക്കേട് നടന്നെന്ന് ആരോപിച്ച് ബിജെപി രംഗത്ത്. ബിജെപി ദേശീയ സെക്രട്ടറി രാഹുൽ സിൻഹയാണ് ആരോപണവുമായി രംഗത്തെത്തിയിരിക്കുന്നത്.

സംസ്ഥാന ഭരണ സംവിധാനത്തെ ഉപയോഗിച്ച് ഭരണകക്ഷിയായ തൃണമൂല്‍ കോണ്‍ഗ്രസ് ഉപതെരഞ്ഞെടുപ്പ് ഫലം തങ്ങള്‍ക്ക് അനുകൂലമാക്കിയതായി സിൻഹ. ഇതുസംബന്ധിച്ച് ദേശീയ തെരഞ്ഞെടുപ്പ് കമ്മീഷന് പരാതി നൽകുമെന്നും സിൻഹ ഐഎഎൻഎസ് വാർത്താ ഏജൻസിയോട് പ്രതികരിച്ചു.

തെരഞ്ഞെടുപ്പ് കമ്മീഷന്റെ കർശന നിരീക്ഷണം ഉണ്ടായിട്ടും അതിനപ്പുറം തെരഞ്ഞെടുപ്പ് ഫലം അട്ടിമറിക്കാന്‍ പലതും ചെയ്യാന്‍ ടിഎംസിക്ക് സാധിക്കുന്നുണ്ട് രാഹുല്‍ സിന്‍ഹ പറഞ്ഞു. ഇലക്ട്രോണിക് വോട്ടിംഗ് മെഷീനിൽ എന്തും നടക്കുമെന്നും ഭരിക്കുന്ന പാർട്ടി കൃത്രിമം കാണിച്ചുവെന്ന ആരോപണം തള്ളിക്കളയാൻ സാധിക്കുന്നതല്ലെന്നും അദ്ദേഹം വ്യക്തമാക്കി.

ഇപ്പോൾ ഉപതെരഞ്ഞെടുപ്പ് നടന്ന കാലിഖഞ്ച്, കരഖ് പൂർ മണ്ഡലങ്ങളിൽ ലോക്സഭ തെരഞ്ഞെടുപ്പ് സമയത്ത് ബിജെപിക്ക് വലിയ ലീഡ് ഉണ്ടായിരുന്നു. 2016ലെ തെരഞ്ഞെടുപ്പിനെക്കാൾ വോട്ട് ഈ തെര‍ഞ്ഞെടുപ്പിൽ ബിജെപിക്ക് ലഭിച്ചിരുന്നു. എന്നിട്ടും ഈ സീറ്റുകളിൽ തോറ്റതാണ് സംശയത്തിന് കാരണം. കര്ഖപൂർ സർദാര്‍ സീറ്റിൽ ആദ്യമായിട്ടാണ് തൃണമൂൽ വിജയിക്കുന്നത്. ഇതും സംശയത്തിന് ഇടയാക്കിയിട്ടുണ്ട്.

മാധ്യമങ്ങളും മറ്റും പറഞ്ഞിരുന്നത് ബിജെപിയാണ് ജയിക്കുക എന്നാണ്. എന്നാല്‍ ഫലം വന്നപ്പോള്‍ മറിച്ചായി. ലോക്സഭ തെരഞ്ഞെടുപ്പിൽ എംപിമാരായി തെരഞ്ഞെടുക്കപ്പെട്ട ബിജെപി എംഎൽഎമാർ രാജിവെച്ച മണ്ഡലങ്ങളിലാണ് ഉപതെരഞ്ഞെടുപ്പ് നടന്നത്.