പനി വകവയ്ക്കാതെ അദ്വാനി എത്തി; വെറുമൊരു വോട്ടറായി വോട്ട് ചെയ്തു

ന്യൂഡൽഹി: 1989നു ശേഷം ഇതാദ്യമായി ബിജെപിയുടെ സ്ഥാപക നേതാക്കളിലൊരാളായ എൽ കെ അദ്വാനി ഒരു സാധാരണ വോട്ടറായി വോട്ട് രേഖപ്പെടുത്തി.

ഇതാദ്യമായി തന്നെയാണ് അദ്വാനി സ്ഥാനാർ‌ഥിയാകാതിരിക്കുന്നതും. അഹമ്മദാബാദിലെ പോളിംഗ് ബൂത്തിലെത്തിയാണ് അദ്ദേഹം വോട്ട് രേഖപ്പെടുത്തിയത്.

പനിയുടെ ബുദ്ധിമുട്ടുകൾ വകവയ്ക്കാതെയാണ് അദ്ദേഹം വോട്ടവകാശം വിനിയോഗിച്ചത്.

102 ഡിഗ്രി ഫാരൻ ഹീറ്റ് പനി അദ്ദേഹത്തിനുണ്ടായിരുന്നു. പാർട്ടി പറഞ്ഞിട്ടും അദ്ദേഹം വിശ്രമിക്കാൻ തയ്യാറായില്ല. 1952 മുതൽ താനിതുവരെ വോട്ട് രേഖപ്പെടുത്താതിരുന്നിട്ടില്ലെന്ന് അദ്ദേഹം പറഞ്ഞു.

ഡൽഹിയിൽ നിന്നാണ് അദ്ദേഹം വോട്ട് ചെയ്യാനെത്തിയത്. മുസ്ലിംകൾ ഏറെയുള്ള ഷാപൂർ ഹിന്ദി സ്കൂളിലാണ് അദ്വാനി വോട്ട് ചെയ്തത്. അദ്ദേഹത്തിനൊപ്പം മകൾ പ്രതിഭ അദ്വാനിയും ഉണ്ടായിരുന്നു. അഹമ്മദാബാദ് എംപി കിരിത് സോളങ്കിയും അദ്ദേഹത്തിനൊപ്പമുണ്ടായിരുന്നു.

തെരഞ്ഞെടുപ്പിൽ ബിജെപി വിജയിക്കുമെന്ന് വോട്ട് രേഖപ്പെടുത്തിയ ശേഷം അദ്ദേഹം പറഞ്ഞു. ഇനി ഒരിക്കലും സ്ഥാനാർഥിയാകില്ലെന്നും അദ്ദേഹം പറഞ്ഞു. ഗാന്ധിനഗറിലെ സിറ്റിംഗ് എംപിയാണ് അദ്വാനി. ഇത്തവണ പാർട്ടി അധ്യക്ഷൻ അമിത്ഷായെയാണ് ഗാന്ധിനഗറിൽ സ്ഥാനാർഥിയാക്കിയത്. അദ്വാനിയെ തെരഞ്ഞെടുപ്പിൽ മത്സരിക്കുന്നതിൽ നിന്ന് ഒഴിവാക്കിയിരുന്നു.