മൂന്നു സേനകളെയും ഏകോപിപ്പിക്കാൻ ഒരാൾ; ചീഫ് ഡിഫൻസ് സ്റ്റാഫ് തസ്തികയ്ക്ക് കേന്ദ്രത്തിന്റെ അംഗീകാരം

മൂന്നു സേനകളുടെ ഏകോപനത്തിനായുള്ള ചീഫ് ഡിഫൻസ് സ്റ്റാഫ് തസ്തികയിക്ക് കേന്ദ്ര സർക്കാരിന‍്റെ അംഗീകാരം. സുരക്ഷ സംബന്ധിച്ച മന്ത്രിസഭാ സമിതിയാണ് 1999-ലെ കാർഗിൽ കമ്മിറ്റിയുടെ ശിപാർശ അംഗീകരിച്ചത്.

സര്‍ക്കാരിന്റെ സൈനിക ഉപദേഷ്ടാവായും ചീഫ്‌സ് ഓഫ് സ്റ്റാഫ് കമ്മിറ്റിയുടെ സ്ഥിരം ചെയര്‍മാനായും സിഡിഎസ് പ്രവര്‍ത്തിക്കും. ഡി.ഡി.എസിന്റെ ഉത്തരവാദിത്തങ്ങളും പ്രവർത്തനവും സംബന്ധിച്ച് ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ നേതൃത്വത്തിലുള്ള ഉന്നതതല സമിതിയുടെ റിപ്പോർട്ടിനും സുരക്ഷ സംബന്ധിച്ച മന്ത്രിസഭാ സമിതി അംഗീകാരം നൽകി.

മൂന്നു സേനകളുടെയും ഏകോപനത്തിനായി സി.ഡി.എസിനെ നിയോഗിക്കുമെന്ന് പ്രധാനമന്ത്രി നരേന്ദ്ര മോദി ഓഗസ്റ്റ് 15 ന് പ്രഖ്യാപിച്ചിരുന്നു. ഇതിനു പിന്നാലെയാണ് ഉത്തരവാദിത്തങ്ങൾ നിർണയിക്കാൻ അജിത് ഡോവലിന്റെ നേതൃത്വത്തിലുള്ള ഉന്നതാധികാര സമിതിയെ നിയോഗിച്ചത്.

ഏതാനും ദിവസങ്ങൾക്കകം രാജ്യത്തെ ആദ്യ സി.ഡി.എസിനെ സർക്കാർ നിയമിക്കും. ആർമി ചീഫ് ജനറൽ സ്ഥാനത്ത് നിന്നും ഡിസംബർ 31 ന് വിരമിക്കുന്ന ബിപിൻ റാവത്തിനെ ഈ തസ്തികയിലേക്ക് പരിഗണിക്കുമെന്നാണ് സൂചന.