ബിജെപിയെ അധികാരത്തിൽനിന്ന് അകറ്റാൻ നായിഡു; മുന്നണി ചർച്ചകൾ സജീവമാക്കി ആന്ധ്രാ മുഖ്യമന്ത്രി

ന്യൂഡൽഹി: വോട്ടെണ്ണലിന് അഞ്ചു ദിവസം മാത്രം നിൽക്കെ കേന്ദ്രത്തിൽ ബിജെപി ഇതര മുന്നണി ചർച്ചകൾ സജീവമാക്കി ആന്ധ്രാപ്രദേശ് മുഖ്യമന്ത്രി എൻ ചന്ദ്രബാബു നായിഡു. ഡൽഹിയിൽ രാഹുൽ ഗാന്ധിയുമായി കൂടിയകാഴ്ച നടത്തിയ നായിഡു ലഖ്‌നൗവിലെത്തി സമാജ്‌വാദി പാർട്ടി അധ്യക്ഷൻ അഖിലേഷ് യാദവിനെ കണ്ടു. BSP അധ്യക്ഷ മായാവതിയുമായും നായിഡു കൂടിക്കാഴ്ച നടത്തുന്നുണ്ട്. 

ഇന്ന് രാവിലെ പത്ത് മണിയോടെ കോൺഗ്രസ് അധ്യക്ഷൻ രാഹുൽ ഗാന്ധിയെ ചന്ദ്രബാബു നായിഡു സന്ദർശിച്ചിരുന്നു. തെരഞ്ഞെടുപ്പ് ഫലം വരുന്നതിന് മുമ്പ് പ്രതിപക്ഷ കക്ഷികൾക്കിടയിൽ സമവായം ഉണ്ടാക്കാനാണ് ചന്ദ്രബാബു നായിഡുവിന്‍റെ ശ്രമം.

ശത്രുപക്ഷത്തായിരുന്ന ടി.ആർ.എസ് ഉൾപ്പടെ ബിജെപി വിരുദ്ധകക്ഷികളുമായി സഖ്യമുണ്ടാക്കുന്നതിനെ കഴിഞ്ഞ ദിവസം ചന്ദ്രബാബു നായിഡു സ്വാഗതം ചെയ്തിരുന്നു.

നേരത്തെ എൻസിപി അധ്യക്ഷൻ ശരത് പവാർ, ഡൽഹി മുഖ്യമന്ത്രി അരവിന്ദ് കെജ്‌രിവാൾ, സിപിഎം ജനറൽ സെക്രട്ടറി സീതാറാം യെച്ചൂരി, സിപിഐ ജനറൽ സെക്രട്ടറി സുധാകർ റെഡ്‌ഡി എന്നിവരുമായി നായിഡു ചർച്ച നടത്തിയിരുന്നു. കോൺഗ്രസ് അധ്യക്ഷ സോണിയ ഗാന്ധി മെയ് 23നു പ്രതിപക്ഷ പാർട്ടികളുടെ യോഗം വിളിച്ചിട്ടുണ്ട്.