കോൺഗ്രസിന്റെ ഡിഎൻഎയിൽ കള്ളത്തരം ഉണ്ട്; 'ന്യായ്' എങ്ങനെ സാധ്യമാകുമെന്ന് യോഗി

അമേത്തി: കോൺഗ്രസിന്റെ മുഖ്യതെരഞ്ഞെടുപ്പ് വാഗ്ദാനമായ ന്യായ് പദ്ധതിയെ വിമർശിച്ച് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. കോണ്‍ഗ്രസിന്റെ ഡിഎൻഎയിൽ തന്നെ കള്ളത്തരം ഉണ്ടെന്നും അപ്പോൾ എങ്ങനെ ന്യായ് സാധ്യമാകുമെന്ന് യോഗി ചോദിച്ചു.

കോൺഗ്രസ് കാലാകാലങ്ങളായി അനീതിയാണ് ചെയ്തു കൊണ്ടിരിക്കുന്നതെന്ന് യോഗി വിമർശിച്ചു.

ബിജെപി സർക്കാരിൽ ഇടനിലക്കാരില്ലെന്നും അതിനാൽ പദ്ധതികൾക്കായുള്ള ഫണ്ടുകൾ ഗുണഭോക്താക്കളിലേക്ക് നേരിട്ടെത്തുന്നെന്നും അദ്ദേഹം പറഞ്ഞു. തെരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം.

കോൺഗ്രസ് ഭരിച്ചിരുന്നപ്പോൾ പാകിസ്ഥാനി ഭീകരർ ജവാന്‍മാരുടെ തലവെട്ടിയിരുന്നതായി അദ്ദേഹം പറഞ്ഞു. എന്നാൽ ഇപ്പോൾ പട്ടാളക്കാർ വീരമൃത്യു വരിക്കുന്നത് പാകിസ്ഥാനിലേക്ക് പോയി പക വീട്ടുന്നതിനിടെയാണെന്നും യോഗി പറഞ്ഞു. രാജ്യത്തിനകത്തും പുറത്തും അതിശയകരമായ കാര്യങ്ങളാണ് യോഗി ചെയ്തിട്ടുള്ളതെന്നും അദ്ദേഹം പറഞ്ഞു.

എസ്പിയുടെയും ബിഎസ്പിയുടെയും ഭരണകാലത്ത് വൈദ്യുതി ഇല്ലാതിരുന്നുവെന്ന് യോഗി. വൈദ്യുതി അനുവദിക്കുന്നതിൽ വിവേചനം ഉണ്ടായിരുന്നുവെന്നും യോഗി. കോൺഗ്രസിന്റെ പദ്ധതികൾ കാരണം തീവ്രവാദവും നക്സലിസവും വർധിച്ചുവെന്നും യോഗി.