ബിജെപി ജില്ലാ കാര്യാലയം ഉപരോധിക്കാൻ കോൺഗ്രസ് പ്രവർത്തകരുടെ ശ്രമം; പ്രവർത്തകർ ഏറ്റുമുട്ടി; നിരവധിപേർക്ക് പരിക്ക്

കന്യാകുമാരി: നാഗർകോവിലിലെ ബിജെപി ജില്ലാ കാര്യാലയം ഉപരോധിക്കാനുള്ള കോൺഗ്രസ് പ്രവർത്തകരുടെ ശ്രമം സംഘർഷത്തിൽ കലാശിച്ചു. ബിജെപി- കോൺഗ്രസ് പ്രവർത്തകർ ഏറ്റുമുട്ടിയതിൽ ഇരു ഭാഗത്തും നിരവധി പ്രവർത്തകർക്ക് പരിക്കേറ്റു. 30 പേർക്കെതിരെ പൊലീസ് കേസെടുത്തു. 13 പേരെ പൊലീസ് അറസ്റ്റ് ചെയ്തു.

നാഗർകോവിൽ നഗരത്തിൽ പോത്തീസിന് മുന്നിലായി ഇന്നലെയാണ് സംഭവം. രാഹുൽ ഗാന്ധിക്ക് അനുകൂലമായി മുദ്രാവാക്യം വിളിച്ച് പ്രകടനം നടത്തിയ കോൺഗ്രസുകാർ ബിജെപി ഓഫീസിനു മുന്നിൽ എത്തി ഓഫീസ് ഉപരോധിക്കാൻ ശ്രമിക്കുകയായിരുന്നു. തുടർന്ന് പ്രകോപനപരമായ മുദ്രാവാക്യം വിളിച്ചത് സംഘർഷത്തിന് കാരണമായി. തുടർന്ന് ഇരുവിഭാഗങ്ങളും ഏറ്റുമുട്ടി.

പരസ്പരം കല്ലെറിയുകയും കമ്പ് കൊണ്ട് ആക്രമണം നടത്തുകയും ചെയ്തതോടെ ഇരു ഭാഗത്തും നിരവധി പ്രവർത്തകർക്ക് പരിക്കേറ്റു, 3 പേർക്ക് തലയ്ക്കാണ് പരിക്കേറ്റത്. വലിയ സംഘർഷത്തിന് നഗരം സാക്ഷ്യം വഹിച്ചത്. കോൺഗ്രസ് പ്രവർത്തകരെ ബിജെപി പ്രവർത്തകർ പാർട്ടി ഓഫീസിന് മുന്നിൽ നിന്നും വിരട്ടി ഓടിച്ചു.

പിന്നാലെ റോഡിൽ ചിതറി കിടന്ന കോൺഗ്രസ് പതാകൾക്ക് ബിജെപി പ്രവർത്തകർ തീയിട്ടു. ഈ സംഭവം നാഗർകോവിൽ ദേശീയ പാതയിൽ കുറച്ചു നേരം യുദ്ധ സമാനമായ അന്തരീക്ഷം സൃഷ്ടിച്ചു.

തുടർന്ന് ബിജെപി, കോൺഗ്രസ് പ്രവർത്തകർ ആക്രമണം നടത്തിയവരെ അറസ്റ്റ് ചെയ്യണമെന്ന് ആവശ്യപ്പെട്ട് റോഡിൽ ഉപരോധ സമരം നടത്തി. പിന്നാലെ പൊലീസ് എത്തി ഇരുവിഭാഗവുമായി ചർച്ച നടത്തി കുറ്റക്കാർക്കെതിരെ നടപടി സ്വീകരിക്കുമെന്ന് ഉറപ്പ് നൽകി. ഇതിനെ തുടർന്ന് പ്രവർത്തകർ പിരിഞ്ഞു പോയി.

തുടർന്ന് സംഭവവുമായി ബന്ധപ്പെട്ട് ഇരു ഭാഗത്തു നിന്നും 30 പേർക്കെതിരെ പൊലീസ് കേസെടുത്തു 13 പേരേ അറസ്റ്റ് ചെയ്തിട്ടുണ്ട്. ജില്ലയിൽ സംഘർഷാവസ്ഥ നിലനിൽക്കുന്നുണ്ട്.