കോവിഡ് 19: രോഗം സ്ഥിരീകരിച്ചയാൾ ഭക്ഷണം കഴിച്ചു; ഡൽഹി ഹയാത്ത് ഹോട്ടൽ അണുവിമുക്തമാക്കുന്നു

ന്യൂഡൽഹി: കോവിഡ് 19 രോഗബാധ സ്ഥിരീകരിച്ചയാൾ ഭക്ഷണം കഴിച്ചതിനെ തുടർന്ന് ഡൽഹിയിലെ പഞ്ചനക്ഷത്ര ഹോട്ടലായ ഹയാത്ത് റീജൻസിയിലെ റെസ്റ്റോറന്‍റ് അണുവിമുക്തമാക്കാൻ നടപടി തുടങ്ങി. ഫെബ്രുവരി 28നാണ് രോഗം സ്ഥിരീകരിച്ചയാൾ ഇവിടെനിന്ന് ഭക്ഷണം കഴിച്ചത്. ഈ ദിവസം ഡ്യൂട്ടിയിലുണ്ടായിരുന്ന ജീവനക്കാരോട് 14 ദിവസം ക്വാറണ്ടൈനിൽ കഴിയാനും ഹോട്ടൽ അധികൃതർ നിർദ്ദേശം നൽകി. കൂടാതെ, ഈ ദിവസം പുറത്തുനിന്ന് ഹോട്ടലിൽ എത്തിയവരോടും അവിടെ താമസിച്ചിരുന്നവരോടും നിരീക്ഷണത്തിൽ കഴിയാൻ അധികൃതർ നിർദേശം നൽകിയിട്ടുണ്ട്.

സർക്കാർ നിർദേശപ്രകാരം ഹോട്ടലിൽ കൊറോണയുമായി ബന്ധപ്പെട്ട മുൻകരുതൽ പ്രവർത്തന പ്രോട്ടോക്കോളും നടപ്പാക്കിയിട്ടുണ്ടെന്ന് മാനേജ്മെന്‍റ് അറിയിച്ചു.

2020 ഫെബ്രുവരി 28ന് ഹയാത്ത് റീജൻസി ഹോട്ടലിലെ ലാ പിയാസ റെസ്റ്റോറന്റിൽ ഭക്ഷണം കഴിച്ച ഒരാൾക്ക് കോവിഡ് -19 രോഗം കണ്ടെത്തിയതായി അധികൃതർ അടുത്തിടെ സ്ഥിരീകരിച്ചിരുന്നു.

"2020 ഫെബ്രുവരി 28 ന് റെസ്റ്റോറന്റിൽ പങ്കെടുത്ത എല്ലാ സഹപ്രവർത്തകരോടും 14 ദിവസത്തേക്ക് സ്വയം നിരീക്ഷണത്തിൽ കഴിയാൻ ആവശ്യപ്പെട്ടിട്ടുണ്ട്.

ഹയാത്ത് റീജൻസി ഡൽഹിയിലെ എല്ലാ സഹപ്രവർത്തകർക്കും കരാറുകാരും ഹോട്ടലിൽ പ്രവേശിച്ച് പുറത്തുകടക്കുമ്പോൾ ശരീര ഊഷ്മാവ് പരിശോധന ആരംഭിച്ചിട്ടുണ്ട്, "മാനേജ്മെന്‍റ് വ്യക്തമാക്കി.

നിലവിൽ ഹോട്ടൽ ജീവനക്കാരിൽ ആർക്കുംതന്നെ കൊറോണ ലക്ഷണങ്ങളോ മറ്റ് ആരോഗ്യപ്രശ്നങ്ങളോ ഇല്ലെന്നും ഹോട്ടൽ അധികൃതർ വ്യക്തമാക്കി.

രോഗബാധ സ്ഥിരീകരിച്ചയാൾ ഭക്ഷണം കഴിക്കാൻ എത്തിയ റെസ്റ്റോറന്റിൽ ആഴത്തിലുള്ള ശുചീകരണ നടപടികൾ തുടങ്ങിക്കഴിഞ്ഞു. കൂടാതെ ഹോട്ടലിൽ ഉടനീളമുള്ള എല്ലാ പൊതു സ്ഥലങ്ങളിലും റെസ്റ്റോറന്റുകളിലും കോൺഫറൻസ് ഹാളിലും ഇത് നടപ്പാക്കും.

അതിഥികളും സഹപ്രവർത്തകരും ആരോഗ്യത്തോടെയും സുരക്ഷിതമായും തുടരുന്നുവെന്ന് ഉറപ്പുവരുത്തുന്നതിനായി, നിലവിലുള്ള ഈ അവസ്ഥയെ സൂക്ഷ്മമായി നിരീക്ഷിക്കുന്നത് തുടരുകയാണെന്ന് ഹോട്ടൽ അധികൃതർ വ്യക്തമാക്കി.

സഹപ്രവർത്തകർക്കിടയിൽ രോഗലക്ഷണങ്ങൾ നിരീക്ഷിക്കുന്നതിൽ ജാഗ്രത പാലിക്കുന്നുവെന്നും അന്താരാഷ്ട്ര, പ്രാദേശിക അധികാരികൾ ശുപാർശ ചെയ്യുന്ന മാർഗ്ഗനിർദ്ദേശങ്ങളും പ്രോട്ടോക്കോളുകളും പാലിക്കുന്നുണ്ടെന്നും ഹയാത്ത് റീജൻസി പറഞ്ഞു.

News 18

“ഞങ്ങളുടെ അതിഥികളെയും സഹപ്രവർത്തകരെയും സംരക്ഷിക്കാൻ ഞങ്ങൾ പ്രതിജ്ഞാബദ്ധരാണ്, കാരണം അവരുടെ സുരക്ഷയും ക്ഷേമവുമാണ് ഏറ്റവും മുഖ്യം,” അധികൃതർ പറഞ്ഞു.

അതിനിടെ ഡൽഹി നോയിഡയിലെ ഒരു സ്വകാര്യ സ്കൂളിലെ വിദ്യാർഥിയുടെ അച്ഛന് കൊറോണ വൈറസ് സ്ഥിരീകരിച്ചതോടെ രണ്ട് സ്കൂളുകൾ അടച്ചു.