കൊറോണ ബാധിച്ച നിരവധിപേർ ട്രെയിനിൽ യാത്രചെയ്തെന്ന് റെയിൽവെ; ട്രെയിൻ യാത്ര ഒഴിവാക്കാൻ നിർദേശം

രാജ്യത്ത് പടർന്നു പിടിക്കുന്ന കൊറോണ വൈറസിനെതിരായ പോരാട്ടം ശക്തമായി തുടരുന്നതിനിടെ കൊറോണ ബാധിച്ച നിരവധി പേർ വിവിധ ട്രെയിനുകളിൽ യാത്ര ചെയ്തതിരുന്നതായി സ്ഥിരീകരിച്ച് റെയില്‍വെ.

പന്ത്രണ്ടോളം കൊറോണ രോഗികൾ യാത്ര ചെയ്തിരുന്നുവെന്നാണ് റെയിൽവെ അറിയിക്കുന്നത്. അതിനാൽ എല്ലാവരും യാത്രകൾ മാറ്റിവയ്ക്കണമെന്നും റെയിൽവെ അഭ്യർഥിക്കുന്നു.

ട്വിറ്ററിലാണ് റെയിൽവെ ഇക്കാര്യം അറിയിച്ചത്. 'കൊറോണ വൈറസ് ബാധിച്ച യാത്രക്കാര്‍ ട്രെയിനില്‍ യാത്ര നടത്തിയതായി കണ്ടെത്തിയിട്ടുണ്ട്. ഇത് ട്രെയിന്‍ യാത്രയെ അപകടം നിറഞ്ഞതാക്കുന്നു.

നിങ്ങളുടെ സഹയാത്രികന് കൊറോണ വൈറസ് ബാധ ഉണ്ടെങ്കില്‍ നിങ്ങള്‍ക്കും രോഗം വരാന്‍ സാധ്യതയുണ്ട് അതിനാല്‍ ട്രെയിന്‍ യാത്ര ഒഴിവാക്കുക. എല്ലാ യാത്രകളും മാറ്റിവച്ച് നിങ്ങളും നിങ്ങളുടെ പ്രിയപ്പെട്ടവരും സുരക്ഷിതരായിരിക്കുക'-റെയിൽവെ ട്വിറ്ററിൽ വ്യക്തമാക്കുന്നു.

മാര്‍ച്ച് 13-ന് സമ്പര്‍ക്കക്രാന്തി എക്‌സ്പ്രസില്‍ യാത്ര ചെയ്ത എട്ടുപേര്‍ക്ക് കൊറോണ വൈറസ് ബാധ സ്ഥിരീകരിച്ചതായി റെയില്‍വേ അറിയിച്ചിരുന്നു. ഡല്‍ഹിയില്‍ നിന്ന് രാമഗുണ്ടത്തിലേക്കുള്ള സമ്പര്‍ക്ക ക്രാന്തി എക്‌സ്പ്രസില്‍ മാര്‍ച്ച് 13 ന് യാത്ര ചെയ്തവരിലാണ് രോഗം സ്ഥിരീകരിച്ചത്.

മുംബൈയില്‍ നിന്ന് ജബല്‍പൂരിലേക്കുള്ള ഗോഡന്‍ എക്‌സ്പ്രസില്‍ (Train 11055) കൊറോണ ബാധയുള്ള നാല് പേര്‍ സഞ്ചരിച്ചതായും റെയില്‍വേ മന്ത്രാലയം സ്ഥിരീകരിച്ചു. മാര്‍ച്ച് 16ന് ട്രെയിനിലെ B1 കോച്ചിലായിരുന്നു ഇവരുടെ യാത്ര. കഴിഞ്ഞയാഴ്ച ദുബായിൽ നിന്ന് വന്നിട്ടുളളവരായിരുന്നു ഇവരെന്നും റെയിൽവെ അറിയിക്കുന്നു.

നിർബന്ധിത നിരീക്ഷണത്തിന് നിർദേശിച്ചിരുന്ന രണ്ട് പേർ ഇന്ന് രാജധാനി ട്രെയിനിൽ ബംഗളൂരുവിനും ഡൽഹിക്കുമിടയിൽ സഞ്ചരിച്ചതായി കണ്ടെത്തി. ഇതിനെ തുടർന്ന് ഇവരെ ഇറക്കിവിട്ടെന്നും കോച്ച് മുഴുവൻ സാനിറ്റൈസർ ഉപയോഗിച്ച് വൃത്തിയാക്കിയെന്നും റെയിൽവെ പറയുന്നു.

മാഹിയിലും കാസര്‍കോടും കൊറോണ സ്ഥിരീകരിച്ച വ്യക്തികള്‍ ട്രെയിനില്‍ സഞ്ചരിച്ചതായി കണ്ടെത്തിയിരുന്നു. ഇതിന്റെയെല്ലാം അടിസ്ഥാനത്തിലാണ് യാത്രകള്‍ മാറ്റിവെക്കാൻ റെയിൽവെ നിർദേശിച്ചിരിക്കുന്നത്.