Delhi Violence: കലാപകാരികൾ തീയിട്ട വീട്ടിൽനിന്ന് ആറ് അയൽക്കാരെ രക്ഷിച്ച യുവാവ് പൊള്ളലേറ്റ് ഗുരുതരാവസ്ഥയിൽ

ന്യൂഡൽഹി: വടക്കുകിഴക്കൻ ഡൽഹിയിലെ ശിവ് വിഹാറിൽ ഇക്കഴിഞ്ഞ ചൊവ്വാഴ്ച രാത്രിയോടെ കലാപകാരികൾ അഴിഞ്ഞാടുന്നു. എതിർ വിഭാഗക്കാരുടെ വീടുകളും വാഹനങ്ങളും വ്യാപകമായി തീയിട്ടു നശിപ്പിക്കുന്നു. ഇതിനിടയിലാണ് ശിവ് വിഹാർ സ്വദേശിയായ പ്രേംകാന്ത് ബാഗൽ എന്ന 29കാരൻ തന്‍റെ അയൽവീട്ടിൽ തീപിടുത്തം നടക്കുന്നത് ശ്രദ്ധയിൽപ്പെട്ടത്.

സ്വന്തം ജീവൻ പോലും നോക്കാതെ അവിടേക്ക് ഓടി കയറിയ പ്രേംകാന്ത് വീട്ടിനുള്ളിൽ ഉണ്ടായിരുന്ന ആറുപേരെ രക്ഷപെടുത്തി. ഇതിനിടയിൽ അദ്ദേഹത്തിന് ഗുരുതരമായി പൊള്ളലേൽക്കുകയും ചെയ്തിരുന്നു. ഇപ്പോൾ ജിടിബി ആശുപത്രിയിലെ പൊള്ളൽ അത്യാഹിത വിഭാഗത്തിൽ ചികിത്സയിലാണ് പ്രേംകാന്ത് ബാഗൽ.

ബാഗലിന്‍റെ നിലയിൽ പുരോഗതിയുണ്ടെന്നും അദ്ദേഹം ജീവിതത്തിലേക്ക് മടങ്ങിയെത്തുമെന്നും സഹോദരൻ സുമിത് ബാഗൽ പറഞ്ഞു. എന്നാൽ ആളിക്കത്തിയ തീയ്ക്ക് ഇടയിലൂടെ പോകുമ്പോൾ പ്രേംകാന്തിന്‍റെ മുഖത്ത് ഗുരുതരമായി പൊള്ളലേറ്റു.

മുഖം ഭാഗികമായി പൊള്ളലേറ്റ നിലയിലാണ് അദ്ദേഹത്തെ ആശുപത്രിയിൽ എത്തിച്ചത്. ആസിഡ് ആക്രമത്തിന് ഇരയായവരെ പോലെയാണ് ഇപ്പോൾ പ്രേംകാന്തിന്‍റെ മുഖം.

എന്നാൽ തന്‍റെ സഹോദരൻ സ്വന്തം ജീവൻപോലും നോക്കാതെ ആറ് ജീവനുകൾ രക്ഷിച്ചത് അഭിമാനകരമായാണ് കാണുന്നതെന്ന് സുമിത് ബാഗൽ പറഞ്ഞു.

ഇസ്ലാം മത വിശ്വാസികളായിരുന്നു ബാഗൽ കുടുംബത്തിന്‍റെ അയൽപക്കത്ത് താമസിച്ചിരുന്നത്. ഇക്കഴിഞ്ഞ ചൊവ്വാഴ്ച അക്രമികൾ അവരുടെ വീടിന് തീവെയ്ക്കുകയായിരുന്നു. ഈ സമയം വീട്ടിനുള്ളിലായിരുന്നവർ പുറത്തേക്ക് കടക്കാനാകാതെ നിസഹായ അവസ്ഥയിലായിരുന്നു.

ടെറസിന്‍റെ മുകളിലായിരുന്ന പ്രേംകാന്ത് അവിടേക്ക് ഓടിയെത്തുകയും ആറുപേരിൽ അഞ്ചുപേരെയും സുരക്ഷിതമായി പുറത്തെത്തിക്കുകയുമായിരുന്നു. എന്നാൽ ആറാമത്തെയാളെ പുറത്തെത്തിക്കാൻ ശ്രമിക്കുന്നതിനിടെ ഇരുവർക്കും പൊള്ളലേറ്റു.

ഇവരെ ആശുപത്രിയിലെത്തിക്കാൻ വൈകിയത് പ്രശ്നം കൂടുതൽ സങ്കീർണമാക്കി. ആശുപത്രിയിൽ എത്തിക്കാൻ ആരും വാഹനം വിട്ടുതരാനോ ആംബുലൻസ് വിളിക്കാനോ തയ്യാറായിരുന്നില്ലെന്ന് സുമിത് ബാഗൽ ആരോപിക്കുന്നു.

ഏറെ കാത്തിരുന്നിട്ടാണ് ഒരു വാഹനം ലഭിക്കുന്നതും ഇരുവരെയും ജിടിബി ആശുപത്രിയിൽ പ്രവേശിപ്പിക്കുകയും ചെയ്തത്.

ഇപ്പോൾ പ്രേംകാന്ത് ബാഗലിന് വിദഗ്ദ്ധ ചികിത്സ ലഭ്യമാക്കുന്നതിനായി ക്രൌഡ് ഫണ്ടിങ് നടന്നുവരികയാണ്. പ്ലാസ്റ്റിക് ശസ്ത്രക്രിയ ഉൾപ്പടെയുള്ള ചികിത്സയാണ് പ്രേംകാന്ത് ബാഗലിനായി ഡോക്ടർമാർ നിർദേശിച്ചിട്ടുണ്ട്.