Delhi violence|അമിത്ഷാ രാജിവെയ്ക്കണം; കേന്ദ്രത്തോട് ആറ് ചോദ്യങ്ങളുമായി സോണിയ ഗാന്ധി

ന്യൂഡല്‍ഹി: ഡൽഹി കലാപത്തിന്റെ പശ്ചാത്തലത്തിൽ ആഭ്യന്തരമന്ത്രി അമിത്ഷാ രാജിവയ്ക്കണമെന്ന് കോൺഗ്രസ് അധ്യക്ഷ സോണിയ ഗാന്ധി.

കലാപത്തിന് കേന്ദ്ര സർക്കാരും ഡൽഹി സർക്കാരും ഒരുപോലെ ഉത്തരവാദികളാണെന്ന് സോണിയാഗാന്ധി പറഞ്ഞു. കോൺഗ്രസ് പ്രവർത്തക സമിതി യോഗത്തിനു ശേഷം വാർത്താ സമ്മേളനത്തിൽ സംസാരിക്കുകയായിരുന്നു സോണിയ ഗാന്ധി.

ഡൽഹി കലാപം ആസൂത്രിതമാണെന്നും സോണിയാഗാന്ധി വ്യക്തമാക്കി. കഴിഞ്ഞ 72 മണിക്കൂറായി ഡൽഹി പൊലീസ് നിഷ്ക്രിയമാണെന്നും സോണിയ ഗാന്ധി കുറ്റപ്പെടുത്തി.

കലാപത്തിൽ മരിച്ചവർക്ക് കോൺഗ്രസ് പ്രവർത്തക സമിതി അനുശോചനം രേഖപ്പെടുത്തുന്നു. പരിക്കേറ്റവർ എത്രയും പെട്ടെന്ന് സുഖം പ്രാപിക്കട്ടെ. ആഭ്യന്തരമന്ത്രി രാജിവയ്ക്കണം. കേന്ദ്ര സർക്കാരിന്റെ നിഷ്ക്രിയത്വമാണ് ഡൽഹിയിലെ പ്രശ്നങ്ങൾക്കു കാരണം- സോണിയ ഗാന്ധി പറഞ്ഞു.

സർക്കാരിനോട് കോൺഗ്രസ് ആറു ചോദ്യങ്ങളും ചോദിച്ചിട്ടുണ്ട്. കഴിഞ്ഞ ഞായറാഴ്ച മുതൽ ആഭ്യന്തമന്ത്രി അമിത്ഷാ എവിടെയായിരുന്നു? അദ്ദേഹം എന്തു ചെയ്യുകയായിരുന്നു? ഡൽഹി തിരഞ്ഞെടുപ്പ് അവസാനിച്ച് ഇന്നത്തെ ദിവസം വരെ രഹസ്യാന്വേഷണ ഏജൻസികൾ നൽകിയ റിപ്പോർട്ടുകൾ എന്തായിരുന്നു?

ആഭ്യന്തരമന്ത്രാലയം അവകാശപ്പെടുന്നതുപോലെ സ്വമേധയാ ഉള്ള അക്രമമാണോ അതോ ആഭ്യന്തര സഹമന്ത്രി അവകാശപ്പെടുന്നതുപോലെ പ്രചോദിപ്പിക്കപ്പെട്ടതാണോ?അക്രമം പൊട്ടിപ്പുറപ്പെടുമെന്ന് വ്യക്തമായ സൂചനകൾ ലഭിക്കുമ്പോൾ ഞായറാഴ്ച രാത്രി വിന്യസിച്ച പൊലീസ് സേനയുടെ കരുത്ത് എന്തായിരുന്നു?

ഡൽഹി പൊലീസിന്റെ നിയന്ത്രണത്തിന് അതീതമാണെന്ന് സാഹചര്യമെന്ന് വ്യക്തമായപ്പോൾ എന്തുകൊണ്ടാണ് അധിക സുരക്ഷാ സേനയെ ഉടൻ വിളിക്കാത്തത്?കഴിഞ്ഞ ഞായറാഴ്ച മുതൽ ഡൽഹി മുഖ്യമന്ത്രി എവിടെയായിരുന്നു? അദ്ദേഹം എന്ത് ചെയ്യുകയായിരുന്നു?

സോണിയ ഗാന്ധിയെ കൂടാതെ മൻമോഹൻ സിംഗ്, എകെ ആന്റണി, ഗുലാംനബി ആസാദ്, പി ചിദംബരം, പ്രിയങ്ക ഗാന്ധി എന്നിവരും കോൺഗ്രസ് പ്രവർത്തക സമിതി യോഗത്തിൽ പങ്കെടുത്തു. എന്നാൽ രാഹുൽ ഗാന്ധിയുടെ അഭാവം ശ്രദ്ധിക്കപ്പെട്ടു. രാഹുൽ ഗാന്ധി വിദേശത്താണെന്നാണ് പാർട്ടി വൃത്തങ്ങൾ അറിയിച്ചിരിക്കുന്നത്.